Qazaqstanda qyzmettiń barlyq salasynda áielderdiń jumysyn ilgeriletý turǵysynda tabysty kórsetkishterge qol jetkizildi. Bul týraly beibitshilik pen qaýipsizdik máselesinde áielderdiń róli taqyrybyna arnalǵan dóńgelek ústel otyrysynda QR Prezidenti Ákimshiligi Basshysynyń orynbasary Aida Balaeva aitty, dep habarlaidy QazAqparat.
«Búgingi jiynda beibitshilik pen qaýipsizdik máselelerin talqylaimyz. Qazirgi kezde osy taqyrypta jan-jaqty ári mańyzdy dialog qajet ekenin belgili. Álemdegi qazirgi ahýal shielenis pen turaqsyzdyqtyń ýshyǵýyn baiqatyp otyr. Qaqtyǵystardyń teris saldary tutas óńirlerge qaýip tóndirip, turaqsyzdyqty týdyrady», - dedi A. Balaeva QR Syrtqy ister ministrliginde ótken jiynda.
Osy oraida ol bul turǵyda 2010 jyly qabyldanǵan «Áielder, beibitshilik jáne qaýipsizdik» BUU Qaýipsizdik keńesiniń qarary erekshe mańyzǵa ie bolyp otyrǵanyn atap ótti.
«Bul qarar, sondai-aq keiingi segiz qujat soǵys pen beibitshiliktiń genderlik ólshemderin jáne qaqtyǵystardy toqtatý men sheshýde áielderdiń mańyzdy rólin moiyndatýǵa yqpal etti. Osymen áielderdi beibit kelissózder protsesterine kóptep tartý, gýmanitarlyq is-qimyl men shielenisten keiingi qalpyna keltirýge qatysýy quqyǵy bekitilgen. Áielderdiń qaýipsizdigi men teńdigi bolmaiynsha turaqty beibitshilikke qol jetkizý múmkin emes ekeni belgili. Qazaqstan tarapy áielderdi memleket qyzmetiniń barlyq salasynda ilgeriletý jáne áielder men qyzdardy zorlyq-zombylyqtan qorǵaý úshin qabyldanǵan tiimdi ári institýtsionaldy sharalar deńgeiinde tiisti tabystarǵa qol jetkizdi», - dedi A. Balaeva.
QR Prezidenti Ákimshiligi Basshysynyń orynbasary QR Prezidentiniń Jarlyǵymen Qazaqstan Respýblikasyndaǵy 2030 jylǵa deiingi otbasylyq jáne genderlik saiasat tujyrymdamasy bekitilgenin, onda barlyq máseleler qamtylǵanyn eske saldy.
