Foto: Pexels.com
Memleket basshysynyń bastamasymen jetekshi bilik organdarynda áielder úshin arnaiy kvotalar engizilip, bul qadam eldegi genderlik teńdikti arttyrýǵa aitarlyqtai úles qosty. Qazirgi tańda Parlamenttegi áiel depýtattardyń úlesi 18,9%-dy (28 depýtat), al máslihattarda 22,7%-dy quraidy, dep habarlaidy Ult.kz QR Mádeniet jáne aqparat ministrligine silteme jasap.
Memlekettik basqarý salasynda da áielderdiń úlesi artyp keledi. 21 ministrliktiń ishinde úsh áiel ministr, segiz vitse-ministr jáne úsh apparat basshysy qyzmet etýde. Sonymen qatar, sýdialardyń 53%-y áielder bolsa, memlekettik qyzmetkerlerdiń jalpy sanyndaǵy áielderdiń úlesi 55,8%-ǵa jetken.
Áielder kásipkerligine de úlken qoldaý kórsetilýde. Búginde shaǵyn jáne orta biznes ieleriniń 48%-y – áielder. «Damý» qory arqyly 4,1 mlrd teńgege 105 myńnan astam áieldiń jobasy qarjylandyryldy. Turǵyn úi jaǵdaiyn jaqsartý úshin «Umai» ipotekalyq baǵdarlamasy iske qosylyp, úsh jyl ishinde 3 660 áielge baspana satyp alýǵa múmkindik berdi.
Sonymen qatar, áielder men balalardy qorǵaý maqsatynda otbasylyq-turmystyq zorlyq-zombylyqqa qarsy zań qabyldanyp, arnaiy politsiia bólimsheleri quryldy. Mádeniet jáne aqparat ministrligi úilestiretin Otbasyn qoldaý ortalyqtarynyń sany da 33-ten 104-ke deiin artty.
Genderlik saiasat aiasyndaǵy jumystar halyqaralyq deńgeide de joǵary baǵalanýda. Qazaqstan 1995 jyly Beijiń deklaratsiiasyna qosylyp, genderlik teńdikke qol jetkizý boiynsha turaqty túrde sharalar atqaryp keledi.
Qazaqstan genderlik teńdikti nyǵaitý baǵytyndaǵy saiasatyn odan ári jalǵastyra otyryp, áielder men erler úshin teń múmkindikter qalyptastyrýǵa umtylýda.
