Qazaqstanda erler men áielder alatyn ailyqtyń aiyrmasy 33 paiyzdy qurap otyr. «BUU áielderi» qurylymynyń Qazaqstandaǵy ókili Ilein Konkevich osyndai kórsetkishti keltirip otyr, dep habarlaidy QazAqparat tilshisi.
«Búgingi shara elimizdegi áielderdiń ekonomikalyq múmkindikterin baǵalaýǵa jáne ony arttyrýǵa baǵyttalyp otyr. Qazirgi tańda Qazaqstannyń ekonomikasy da, áielderdiń ekonomikaǵa aralasý deńgeii de artyp keledi. Alaida jalpy jaǵdai biz oilaǵandai boldy deýge áste kelmeidi. Iá, shaǵyn jáne orta bzneste áielderdiń jetekshi bolyp júrgenin jii kórýge bolady. Alaida negizinen basshylyqta kóbinese er adamdardyń otyrǵanyn atap ótý kerek. Qazaqstanda er adamdar men áielderdiń ailyǵynyń aiyrmashylyǵy aiqyn baiqalady», - deidi ol elordada «Qazaqstandaǵy áielderdiń ekonomikalyq quqyqtary men múmkindikterin keńeitý: tájiribe, syn-qaterler jáne perspektivalar» atty konferentsiiada.
Ilein Konkevichtiń aitýynsha, er adamdar men áielderdiń úidegi mindettemelerin zertteý kerek.
«Ekonomika salasyna áielderdiń úlesin arttyrý baǵytynda búgin utymdy usynystardy tyńdaimyn degen úmitim bar. Sonymen qatar, áielder jumys oryndary boiynsha konkýrstarǵa qatysa alatyndai áleýmettik júieni qoldaý kerek. Bul rette kóbirek balabaqsha men úidegi mindettemelerdi atqarýda erlerden qoldaý qajet. Ásirese, investitsiia, infraqurylym, energetika, kólik sekildi salalarda áielderdiń jumys isteýi sirek. Aýyldaǵy áielderdi qoldaý boiynsha jobalardyń baryn atap ótý kerek», - deidi ol.
Ilein Konkevichtiń sózine qulaq assaq, erler men áielderdiń ailyqtarynyń arasyndaǵy aiyrma 33 paiyzdy quraidy.
«Qazirgi tańda áielder er adamdardyń ailyǵynyń 67 paiyzyn ǵana alyp otyr. Álbette, iri kompaniialardy basqaryp otyrǵan áielderdiń baryn aita ketý kerek. Dese de, olardyń sany az. Kóbinese, atap ótkenimdei, áielder tek shaǵyn jáne orta bizneste jetekshilik etýde», - deidi Ilein Konkevich.
