2021 jyldyń qańtarynda Qazaqstan aýmaǵynda 5 981 avtokólik quraly qurastyryldy. Bul týraly «QazAvtoÓnerkásip» Qazaqstannyń avtomobil salasy kásiporyndarynyń odaǵy málim etti, dep habarlaidy "Ult aqparat".
«Osy jyldyń qańtarynda Qazaqstan aýmaǵynda jalpy quny 43,1 mlrd teńge bolatyn 5 981 avtokólik (jeńil, júk kólikterin, avtobýstardy, arnaýly mashinalar men tirkemelerdi qosa alǵanda) shyǵaryldy. Naqty mánde shyǵarylǵan ónim kólemi ótken jylǵy kórsetkishten 1,8 paiyzǵa asyp tústi» delingen taratylǵan aqparatta.
Odaq málimetinshe, jeńil avtomobil óndirisi 3,9 paiyzǵa artyp, 5 393 kólik qurastyryldy. 150 avtobýs shyǵaryldy.
Esepti kezeń qorytyndysynda qurastyrylǵan avtobýstar sany 4,5 ese kóp bolyp otyr.
Degenmen, júk kólikterin qurastyrý 1,5 ese tómendep 363 boldy.
Tirkeme shyǵarý 99-dan 67-ge deiin kemidi.
Munan bólek 8 mamandandyrylǵan avtotehnika shyǵaryldy.
Qańtarda otandyq óndiris oshaqtarynan shyǵarylǵan 5 381 kólik satyldy.
Bul - ótken jylǵy kórsetkishten 53 paiyzǵa joǵary.
«QazAvtoÓnerkásip» kásiporyndarynyń naryqtaǵy úlesi 65,6 paiyzdan 64,6 paiyzǵa deiin tómendedi.
