Qazaqstanda aýyr dertke shaldyqqan 3-18 jas aralyǵyndaǵy balalardyń armanyn oryndaýmen ainalysatyn «Menin Armanym» atty korporativti qor quryldy, dep habarlaidy "Ult aqparat".
Qazaqstanda aýyr dertke, jazylmas dertke shaldyqqan myńdaǵan bala bar. Olardyń arasynda jaryq dúniemen qoshtasýyna sanaýly jyldar, tipti sanaýly ailar qalǵandary qanshama. Atalǵan qaiyrymdylyq jobasynyń maqsaty – aýyr dertke shaldyqqan balalardyń armanyn kózi tirisinde oryndaýǵa atsalysý.
Joba balalardyń mynadai armanyn ornydaýǵa daiyn:
- «Ýaqytsha ... bolǵym keledi» (ǵalym, politsiia qyzmetkeri, aspaz, traktor júrgizýshisi, hanshaiym)
- «... barǵym keledi» (zoobaqqa, murajaiǵa, basqa qalaǵa, teatrǵa, telebaǵdarlama túsirilimine)
- «... kezdeskim keledi nemese qoltańbasyn alǵym keledi» (súiikti sportshymmen, ánshimen, telejúrgizýshimen, saiasatkermen nemese basqa da tanymal qazaqstandyq tulǵamen)
- «Atap ótkim keledi» (týǵan kún, jańa jyl, toi)
«Aýyr dertke shaldyqqan balalardyń mundai armanyn jobaǵa demeýshi bolý arqyly, volonterlik qozǵalysqa nemese Qazaqstan aýmaǵynda qaiyrymdylyq baǵytynda jumys isteitin uiymǵa múshe bolý arqyly júzege asyrýǵa bolady. Atalǵan qor balalardyń armanyn júzege asyrý úshin qarajat jinaýmen ainalysady. Jinalǵan qarajat balalarǵa syilyq alýǵa nemese dertin emdeýge jumsalady», - deidi jobanyń media-koordinatory Oljas Esbolov.
«Menin Armanym» jobasyna kóp alǵys aitamyn. Osy joba arqyly meniń tilegim oryndaldy. Meniń armanym – taýǵa shyǵý, bloger bolý jáne Qazaqstannyń bedeldi vainerleri @nnnurdaylet pen @sadraddinn-di kórý edi. «Menin Armanym» jobasy maǵan tosynsyi jasap, osy úsh tilegimdi oryndady», - deidi Almatydaǵy onkologiialyq ortalyqta emdelip jatqan 12 jastaǵy Didar Berdaliev.
D.Berdalievtiń anasy ulynyń armany oryndalǵany úshin qýanyshty ekenin aitýda.
«Didar biyl mamyr aiynan bastap aýyryp qaldy. Tarazda oǵan ota jasaldy. Ol jaqta eki ai emdelip, Almatydaǵy onkologiialyq ortalyqqa keldik. 1 ai boiy himiiaterapiia qabyldaimyz. Negizi ulym 1-synyptan bastap 1, 1,5 ailap aýyratyn. Mán bermei júre berippiz... Ózim Aqtaý, Atyraýda vahtamen jumys isteimin. Ulym basy aýyratynyn aitqanda dári bere beretinbiz. 5-synypta qulaǵynan qan aǵyp, qulap qalǵan kezde ǵana qandai derti bar ekenin bildik. Balam osy joba arqyly úsh armany oryndalatynyn bilgen kezde senbei, bir jylap aldy. Taýǵa baratyn kiimi joq edi, ony da ýaiymdady. Osy joba aiasynda oǵan kerekti kiimderi de berildi. Bári jaqsy boldy», - deidi Janat Berdalieva.
