Foto: pixabay.com
Qazaqstannyń eki óńirinde áýe saparynyń baǵasy 50 paiyzdan asa qymbattady, dep habarlaidy kaz.tengritravel.kz portaly Energyprom sarapshylaryna silteme jasap.
"2022 jyldyń jeltoqsanynyń qorytyndysy boiynsha áýe jolaýshylar kóligi qyzmetteriniń quny bir jylda 16,8 paiyzǵa ósti", - deidi sarapshylar.
Óńirlerge bólip alǵanda Batys Qazaqstan oblysynyń turǵyndary baǵanyń ósýin qatty sezindi: birden +67 paiyz.
Sondai-aq, antiliderlerdiń úshtigine jylyna 57,3 paiyzben Abai oblysy jáne 43,2 paiyz kórsetkishpen Qostanai oblysy kirdi.
"Qazaqstannyń 20 óńiriniń tek Ulytaý jáne Almaty oblystarynda ǵana baǵanyń tómendeýi baiqaldy: tiisinshe 20,8 paiyzǵa jáne 3,9 paiyzǵa", - dep naqtylady avtorlar.
2022 jyldyń qańtar-jeltoqsany aralyǵynda áýekompaniialar 11 million jolaýshyny tasymaldady. Bul ótken jylmen salystyrǵanda 16,5 paiyzǵa ósti. Eń joǵary kórsetkishter Almatyda tirkeldi: 7,4 million adam - jylyna 11 paiyz. Odan keiin Shymkent pen Astana keledi.
