Memleket basshysynyń tapsyrmasyn oryndaý aiasynda otandyq aviakompaniialar ishki marshrýttar boiynsha ekonom-klasty aviabilettiń ortasha qunyn shamamen 13,6%-ǵa tómendetti, dep habarlaidy "Ult aqparat" QR Indýstriia jáne infraqurylymdyq damý ministrligine silteme jasap.
«Bilet qunyn arzandatý úshin ministrlik «ashyq aspan» rejimin engizý, Túrkistan qalasynyń áýejaiyn ashý jáne otandyq tómen biýdjettik «Fly Arystan» áýekompaniiasyn iske qosý siiaqty birqatar shara atqardy. Bul áýe kóligindegi básekelestikti arttyrýǵa yqpal etedi, nátijesinde áýe biletteri tarifteriniń tómendeýine kómektesedi. Iske qosylǵan sátten bastap, «Fly Arystan» shamamen 3,3 mln bilet satty, onyń ishinde 50%-ǵa jýyǵy eń tómengi tarif boiynsha 10 myń teńgeden tómen satylǵan. «Fly Arystan» áýekompaniiasynyń tarifteri bir baǵytqa qarai 4999 teńgeden bastalady», - dep jazylǵan QR IIDM habarlamasynda.
Sonymen birge, 2020 jyly Túrkistan qalasynyń jańa áýejaiy iske qosylǵan. Qazirgi ýaqytta Túrkistannan Nur-Sultan (7), Almaty (4), Atyraý (2) qalalaryna aptasyna 13 reis oryndalyp jatyr. Sondai-aq, Ystanbulǵa aptasyna 2 ret halyqaralyq reis jasalady jáne mamyrdyń ekinshi jartysynan bastap, aptasyna 4 ret ulǵaitý josparlanýda. Sonymen birge, Bishkek pen Tashkentke turaqty reister ashý kózdelgen.
2019 jylǵy 1 qarashadan bastap Qazaqstannyń 11 áýejaiynda «ashyq aspan» rejimin engizý de áýe biletteriniń qunyn tómendetýge baǵyttalǵan. Bul rejim reister sany boiynsha barlyq shekteýlerdi alyp tastaýdy jáne sheteldik aviakompaniialarǵa «áýe erkindiginiń» besinshi dárejesin berýdi kózdeidi. Túrkistan qalasynyń jańa áýejaiynda da osy rejim engizilgen.
«Qazaqstanda «ashyq aspan» rejimin engizý jańa sheteldik tasymaldaýshylardy tartýǵa, halyqaralyq baǵyttardy ashýǵa, áýe biletteriniń qunyn tómendetýge, týrizmdi damytýǵa jáne AHQO-nyń kóliktik qoljetimdiligin arttyrýǵa yqpal etedi dep kútilgen edi. Alaida, COVID-19 jáne halyqaralyq ushýlardy oryndaýǵa engizilgen shekteýlerge bailanysty jobany biyl tolyq kólemde iske asyrý qiyn boldy. Osy jumys aiasynda ministrlik 20-dan astam elmen (Katar, BAÁ, Oman, Kýveit, Bahrein, Iordaniia, Malaiziia, Avstriia jáne t.b.) kelissózder júrgizdi, Qatar Airways, Israir, Air Asia, Salam Air, Jazeera Airways, Blue Air, Turkish Airlines jáne t. b. sheteldik aviakompaniialardyń jańa halyqaralyq baǵyttaryn ashý josparlandy. Alaida, koronavirýs infektsiiasynyń taralýy bul reisterdiń ashylýy belgisiz merzimge keiinge qaldyryldy», - deidi ministrlik.
Qazirgi ýaqytta ishki reisterdiń oryndalýy qalpyna keltirildi. 2021 jylǵy 5 mamyrdaǵy jaǵdai boiynsha halyqaralyq baǵyttarda turaqty reister aptasyna 117 reis jiiligimen 40 marshrýt boiynsha 13 elde oryndalady, bul pandemiiaǵa deiingi halyqaralyq reisterdiń tek 26,4% quraidy.
«Ishki reisterdi qysqartý, halyqaralyq aviareisterdi toqtata turý jáne qaita bastaý týraly sheshimderdi Qazaqstan Respýblikasynyń aýmaǵynda koronavirýs infektsiiasynyń paida bolýy men taralýyna jol bermeý jónindegi vedomstvoaralyq komissiia qabyldaitynyn atap ótý qajet. Memleket basshysynyń tapsyrmasyn oryndaý aiasynda otandyq aviakompaniialar ishki marshrýttar boiynsha ekonom-klasty aviabilettiń ortasha qunyn orta eseppen 13,6%-ǵa tómendetti», - deidi QR Indýstriia jáne infraqurylymdyq damý ministrligi.
