Foto: pexels.com
Qazaqstanda áskeri qyzmetshilerdiń jalaqysyn 50%-ǵa jýyq kóterý jáne qyzmet merzimine bailanysty zeinetaqy tólemderin arttyrý josparlanyp otyr, dep habarlaidy Ult.kz Qazaqstan premer-ministriniń jaýabyna silteme jasap.
Qazaqstandaǵy áskeri qyzmetshilerdiń eńbekaqy júiesine ózgerister engizilip, aldaǵy eki jylda áskeri qyzmetshilerdiń jalaqysyn orta eseppen 50%-ǵa jýyq kóterý kózdelgen.
Bul týraly premer-ministr Oljas Bektenovtiń senator Andrei Lýkinniń depýtattyq saýalyna jaýabynda aitylǵan.
"Qazaqstan Respýblikasynyń Áleýmettik kodeksiniń 220-babyna sáikes, áskeri zeinetkerlerge qyzmet merzimi boiynsha zeinetaqy jinaqtarynyń qaldyǵyn turǵyn úi jaǵdaiyn jaqsartý men emdelýge tolyq kólemde bir rettik paidalaný quqyǵy berilgen. Sonymen qatar premer-ministrdiń orynbasary Tamara Dúisenovanyń basshylyǵymen áskeri qyzmetshiler úshin zeinetaqy tólemderin qazirgi 50-65%-dyń ornyna 60-75% mólsherinde qyzmettik jalaqydan esepteý boiynsha másele qarastyrylyp jatyr. Áskeri qyzmetshilerdi materialdyq yntalandyrý maqsatynda 2024 jylǵy 27 qyrkúiekte Qazaqstan Respýblikasy Úkimetiniń qaýlysymen quqyq qorǵaý organdary qyzmetkerleriniń eńbekaqy tóleý júiesine kóshý kózdelgen, oǵan sáikes aldaǵy eki jyl ishinde (2025-2026 jyldar) áskeri qyzmetshilerdiń laýazymdyq jalaqysyn orta eseppen 48,2%-ǵa kóterý josparlanǵan", – delingen Bektenovtiń jaýabynda.
Birinshi kezeńde ofitserlik quramnyń laýazymdyq jalaqysyn orta eseppen 20,3%-ǵa, al qatardaǵy jáne serjanttyq quramnyń jalaqysyn 33,9%-ǵa kóterý kózdelgen. Ekinshi kezeńde ofitserlik quramnyń laýazymdyq jalaqysyn orta eseppen 23%-ǵa, al qatardaǵy jáne serjanttyq quramnyń jalaqysyn 10%-ǵa kóterý josparlanǵan.
"Sonymen qatar men múddeli memlekettik organdarǵa kommýnaldyq qyzmetterdi 50% kóleminde óteý, dalalyq tólemder (qosymsha ústemeaqy), áskeri qyzmetshiler men olardyń otbasylaryna jylyna bir ret temirjol kóligimen tegin demalysqa barý jáne keri qaitý jol júrý shyǵyndaryn óteý, sondai-aq qalalyq, qala mańyndaǵy jáne jergilikti qoǵamdyq kólikte tegin júrý máselelerin qarastyrý boiynsha tiisti tapsyrmalar berdim", – delingen jaýapta.
Premer-ministrdiń málimetinshe, áleýmettik qamtamasyz etý aiasynda kóptegen áskeri qyzmetshiler men olardyń otbasylaryna turǵyn úi tólemderi respýblikalyq biýdjetten júrgiziledi. Biyl bul soma 118,5 mlrd teńgege jetken. Atalǵan tólemder turǵyn úi satyp alý, jalǵa alý jáne turǵyn úi jaǵdaiyn jaqsartýǵa baǵyttalǵan.
