Qazirgi kezde Armeniiadan Qazaqstanǵa jetkizilgen 11 myń avtokólik tirkeldi. Bul týraly QR IIM Ákimshilik politsiia komiteti tóraǵasynyń orynbasary Serik Túsipov málim etti, dep habarlaidy "Ult aqparat".
«Memleket basshysynyń tapsyrmasy boiynsha Armeniiadan jetkizilgen avtomobilderdi tirkeý tetigin Úkimet ázirlegen bolatyn. 20 mamyrda Úkimet qaýlysy qabyldanyp, onda osy kólikterdi tirkeýdiń naqty tártibi aiqyndaldy. Azamattar úshin tirkeý talaptary aitarlyqtai qolaily. 1 maýsymnan tirkeý sharalary bastaldy. Búginde tirkeý talaptaryna enip turǵan 14 myń kóliktiń 11 myńǵa jýyǵy tirkeldi. Kún saiyn shamamen 400-den astam avtomobil tirkeýden ótip jatyr», - dedi Túsipov Ortalyq kommýnikatsiialar qyzmetinde.
Onyń sózine qaraǵanda, Armeniiadan jetkizilgen osy kólikter Qazaqstanda tirkelgennen keiin, ony paidalaný merzimine shekteý jasalmaidy. Eger kólik iesi óziniń kóligin Qazaqstandaǵy tirkeýden shyǵarǵysy kelse, ol tiisti merzimge kólik salyǵyn tólep, qazaqstandyq nómir men tehpasportty tapsyryp, mamandandyrylǵan halyqqa qyzmet kórsetý ortalyǵynda armian tehpasporty men memlekettik nómirin qaitaryp alady.
Eske sala keteiik, basqarý organdary sol jaqta ornalasqan, Armeniia Respýblikasynyń ýákiletti organdarynda Qazaqstan azamattaryna tirkelgen jáne olar Qazaqstanǵa 2020 jylǵy 1 aqpanǵa deiin ákelgen avtomobilder tirkeýge jatady (Qazaqstan Respýblikasy Úkimetiniń aǵymdaǵy jylǵy 20 mamyrdaǵy№ 306 qaýlysy).
