Foto: Polisia.kz
Qazaqstannyń Abai, Jetisý, Shyǵys Qazaqstan jáne Túrkistan oblystarynda altyn quramdy materialdardy zańsyz óndirý jáne óńdeýmen ainalysqan bes kásiporynnyń qyzmeti toqtatyldy, dep habarlaidy Ult.kz.
Ishki ister ministrligi men Ulttyq qaýipsizdik komiteti qyzmetkerleriniń Bas prokýratýranyń úilestirýimen júrgizgen tekserý barysynda atalǵan kásiporyndardyń tek geologiialyq barlaý júrgizýge litsenziialary bola tura, arnaiy tehnika men óndiristik jabdyqtardy paidalanyp, altyn quramdy kendi keń kólemde zańsyz óndirgeni anyqtaldy.
Tintý kezinde 6 700 tonnadan astam altyn quramdy ken, 300 tonna suiyq ken (pýlpa), 120 tonna selitra, jarylǵysh zattar men detonatorlar tárkilendi. Sonymen qatar oqiǵa ornynan 45 arnaiy tehnika alyndy.
Politsiia bólimine 62 adam jetkizildi, onyń ishinde birneshe jaýapkershiligi shekteýli seriktestikterdiń direktorlary men quryltaishylary bar.
"Anyqtalǵan zań buzýshylyqtar boiynsha quramynda baǵaly metaldar bar shikizattyń zańsyz ainalymy faktileri boiynsha bes qylmystyq is tirkeldi. Memleketke asa iri kólemde zalal keltirilgeni anyqtaldy, - dedi IIM uiymdasqan qylmysqa qarsy kúres departamentiniń ókili Qýandyq Alpys.
