Ádilet ministri Marat Beketaev aliment tóleýshilerge arnalǵan kómek qoryn qurý máselesin kóterdi, dep habarlaidy QazAqparat tilshisi.
«Qordyń tujyrymy shet memleketterdiń tájiribesine negizdelip otyr. Álem elderiniń tájiribelerin tereń taldadyq. Máselen, Finliandiiada ómirdiń qiyn kezeńine tap bolǵan (mysaly, aýyryp qalǵan nemese jumystan shyǵyp qalǵan) aliment tóleýshilerge kómektesetin qor bar. Ol elde boryshkerler qordan aqsha alyp, bereshegin ótep, jaǵdaiy jaqsarǵannan keiin qaitadan qordy toltyrýǵa mindettelgen», - dedi Marat Beketaev Ádilet ministrliginde ótken dóńgelek ústelden keiin tilshilerdiń suraǵyna jaýap bere otyryp.
Ádilet ministrliginiń sózine súiensek, Finliandiiadaǵy atalmysh qor tek aliment tóleýshilerge arnalǵan. Qordyń qarajaty basqa qajettilikterge jumsalmaidy.
«Bizdiń elimizde dál sondai qor qurý úshin jalpy qansha somadaǵy aliment tólenip jatqanyn, qandai sanattaǵy azamattar qordan kómek ala alatynyn – bárin zertteý kerek. Qordy birden qura salǵan jaramas», - dedi ol.
Ministr, sonymen birge, ár azamattyń basyndaǵy jaǵdai boiynsha erekshelikterdi eskerip, aliment tóleýshilerdiń daiyn aqshaǵa úirenip qalmaýyna da mańyz berý kerektigin aitady.
«Búgingi kezdesýde ÚEU músheleriniń biri qorǵa bailanysty taǵy bir mańyzdy máseleni kóterdi. Otbasyndaǵy jaǵdaidyń mán-jaiyn zerttep alý kerek. Iaǵni, ol aqsha bireýge berilip, ekinshige berilmeýi múmkin. Alaiaqtyq jaǵdailary da oryn alýy yqtimal. Sol sebepti osy máselege óte tereń taldaý júrgizip kelemiz. Pilottyq joba bastaý úshin biz Májilis depýtattarymen birge sot oryndaýshylardyń mártebesi týraly zańǵa ózgeris engizý bastamasyn kóterdik. Dál qazir sot oryndaýshylarǵa «aqsha jinańdar» dei almaimyz nemese biýdjetten aqsha ala salý da jón bolmaidy. Zańnamalyq negizdeme kerek. Pilottyq jobany bastaý úshin ózgerister de qajet», - dedi Marat Beketaev.
Ministr aldaǵy 3-5 jylda osyndai qordyń qurylýy ábden múmkin ekenin atap ótti.
«Ýaqyt boiynsha parametrlerge asyǵys boljam jasaǵym kelmeidi. Sebebi, bári de ekonomikaǵa bailanysty. Qajettilikpen, qarajat kózimen aiqyndap alatyn sharýalar jeterlik. Bul sharýaǵa endi ǵana jaqyndap kelemiz», - dedi Beketaev.
