Foto: elements.envato.com
Qazaqstanda aliment tólemegeni úshin 1 618 adam izdestirilip jatyr. Onyń ishinde erlerdiń sany – 1 476, al áielder – 142, dep habarlaidy "Ult aqparat" Bas prokýratýranyń Quqyqtyq statistika jáne arnaiy esepke alý jónindegi komitetine silteme jasap.
Vedomstvo málimetinshe, izdeýde júrgenderdiń kóbisi - 31 jastan 40 jasqa deiingiler.
Óńirler boiynsha:
• Astanada – 361,
• Almaty – 191,
• Aqtóbe – 143,
• Qostanai – 140,
• Jambyl – 140,
• Pavlodar – 108,
• Almaty – 102,
• Mańǵystaý oblysynda 59 adamǵa izdeý salynǵan.
2023 jyldyń 9 aiynda sotqa deiingi tergep-tekserýdiń biryńǵai tiziliminde aliment tóleý jónindegi mindetterdi qasaqana oryndamaý faktileri boiynsha 427 qylmystyq is tirkelgen (qylmystyq kodekstiń 139-baby). Aita ketsek, Qylmystyq kodekstiń 139-baby boiynsha alty júz saǵatqa deiingi merzimge qoǵamdyq jumystarǵa tartý ne eki jylǵa deiingi merzimge bas bostandyǵyn shekteý ne sol merzimge bas bostandyǵynan aiyrý túrindegi jaza kózdelgen.
Oblystar boiynsha mundai qylmystyq quqyq buzýshylyqtadyń eń kóp bóligi myna óńirlerde:
• Mańǵystaý – 46,
• Almaty oblysynda – 45,
• Qostanai – 44,
• Shyǵys Qazaqstan – 43,
• Pavlodar – 40,
• Qaraǵandy – 35,
• Abai – 32,
• Aqmola – 26,
• Soltústik Qazaqstan-21,
• Astana qalasynda – 17 fakti tirkelgen.
Osy kezeńde Qylmystyq kodekstiń 139-baby boiynsha 207 adam sottaldy. 4 adam bas bostandyǵynan aiyryldy, 2 adam shartty túrde sottaldy, 196 adamnyń bas bostandyǵy shekteldi, 5-eýi qoǵamdyq jumystarǵa tartyldy.
Jalpy aliment boiynsha sot oryndaýshylardyń óndirisinde aliment óndirip alý týraly 309 670 atqarýshylyq is oryndaýda boldy. Bul rette balalarǵa ǵana emes, ata-analaryn, jubaiyn (zaiybyn) kútip-baǵýǵa aliment óndirip alynady.
• 291 886 atqarýshylyq is - balalardy kútip-baǵýǵa arnalǵan aliment boiynsha;
• 773 atqarýshylyq is - eńbekke qabiletsiz ata-analaryn kútip-baǵýǵa;
• 4 506 atqarýshylyq is - eńbekke qabiletsiz jubaiyn (zaiybyn) kútip-baǵý óndiristeri boldy.
Budan basqa, kórsetilgen kezeńde sottarmen buiryq tártibinde kámeletke tolmaǵan balalardy asyraýǵa aliment óndirip alýǵa qatysty 31 493 azamattyq is qaraldy.
