Foto: QR Prezidenti Is basqarmasy
QR Prezidenti Is basqarmasy Meditsinalyq ortalyǵynyń aýrýhanasynda el tarihynda jáne Ortalyq Aziiada alǵash ret júrekke robottandyrylǵan tehnologiia arqyly ota sátti jasaldy, dep habarlaidy Ult.kz QR Prezidenti Is basqarmasyna silteme jasap.
Bul operatsiiany Meditsinalyq ortalyq aýrýhanasynyń kardiohirýrgteri Qytaidan kelgen mamandar tobymen birlese otyryp, Halyqaralyq ǵylymi-tájiribelik konferentsiianyń aiasynda júzege asyrdy.
Týa bitken júrek aqaýy – júrekshelik perde aqaýy bar 28 jastaǵy naýqasqa sońǵy úlgidegi robottandyrylǵan hirýrgiialyq júie arqyly ota jasaldy. Operatsiia dástúrli ádis – sternotomiiasyz, iaǵni keýde súiegin ashpai, shaǵyn tilik arqyly júrgizildi. Qazirgi ýaqytta naýqastyń jaǵdaiy qalypty. Meditsinalyq ortalyqtyń málimdeýinshe, bul operatsiia – joǵary tehnologiialy kardiohirýrgiiany damytý men meditsina salasyndaǵy halyqaralyq yntymaqtastyqty nyǵaitý jolyndaǵy mańyzdy qadam boldy.
Aita ketý kerek, konferentsiia aiasynda halyqaralyq mamandardyń konsýltatsiiasy ótti. Meditsina ǵylymdarynyń doktory, kardiolog ári fýnktsionaldy diagnostika mamany (Máskeý) Olga Djioeva Meditsinalyq ortalyq aýrýhanasynyń kardiolog mamandarymen birge naýqastardy qabyldasa, Japoniiadan kelgen dáriger, Áýlie Mariia aýrýhanasy gematologiia bóliminiń meńgerýshisi, professor Jeon Yungwoo toǵyz patsientke konsýltatsiia ótkizdi.
Esterińizge salsaq, Astanada ótken iri Halyqaralyq ǵylymi-tájiribelik konferentsiia óz jumysyn aiaqtady. Baǵdarlama kardiohirýrgiia, onkologiia, iadrolyq meditsina, neirohirýrgiia, terapiia, tsifrlandyrý, farmatsevtikalyq retteý, meiirbikelik is, kóshbasshylyq pen meditsinalyq kómektiń sapasyn basqarý siiaqty ózekti taqyryptardy qamtydy.
Forýmnyń jumysyna jetekshi klinikalar, Qazaqstandaǵy ǵylymi institýttar men ýniversitetterdiń ókilderi, sondai-aq onnan asa elden kelgen sheteldik sarapshylar qatysty.
Konferentsiia tájiribe almasý, innovatsiialyq meditsinalyq jáne bilim berý tehnologiialaryn damytý alańyna ainaldy.
Barlyǵy tórt myńǵa jýyq adam konferentsiianyń onlain jáne oflain formattaryndaǵy is-sharalaryna qatysty. Sessiialardyń tikelei transliatsiialaryn qaraý sany tórt myńnan asty.
