Qazaqstanda «Mobile Blockbuster film festival» (MBff) qysqa metrajdy filmderdiń alǵashqy festival bastaldy. Jobanyń ereksheligi – baiqaýǵa qatysatyn barlyq filmder planshet nemese telefon kamerasyna túsirilýi qajet, dep habarlaidy "Ult aqparat".
Joba arqyly festival uiymdastyrýshylary - stsenarist jáne rejisser Dmitrii Bainazarov bastaǵan MBff Production toby karantin kezeńinde shyǵarmashylyq qairatkerlerge qoldaý kórsetip, olardyń shyǵarmashylyq energiiasy men darynyn jańa baǵytqa burýǵa sheshim qabyldady.
«Mobildi kinonyń kino indýstriiaǵa jańa format retinde engenine 10 jyldan astam ýaqyt boldy. Alaida, bizdiń elde jáne búkil TMD elderinde ónerdiń bul túrine qyzyǵýshylyq endi ǵana artyp kele jatyr. Zamanaýi gadjetterdiń qosymsha jabdyqtarsyz jáne shyǵynsyz joǵary sapaly foto nemese video jasaityn múmkindigi bar. Mundai tehnologiialar talantty rejisserler men operatorlarǵa óz ideialaryn júzege asyrýǵa, eksperiment júrgizýge, jańa vizýaldy sheshimderdi izdeýge, sol arqyly sandyq tehnologiialarmen bir baǵytta qozǵalýǵa múmkindik beredi. Osy oraida, Adam potentsiialyn damytýdy maqsat tutatyn Tuńǵysh Prezident Qory mobildi kino formatyndaǵy otandyq kino óndirisindegi jańa esimderdi qoldaýǵa daiyn», - deidi Qordyń Almatydaǵy ókildiginiń direktory Sergei Tohtarov.
Mobile Blockbuster film festival baiqaýynyń taqyryby – «maskalar». Maskalar sóziniń maǵynasy keń. Ol meditsinalyq, teatrlyq, áleýmettik jáne adamnyń kúndelikti ómirde kietin maskasy bolýy múmkin.
Baiqaýǵa qatysý úshin filmdi tek smartfonǵa nemese planshetke túsirý kerek. Filmderdiń jalpy uzaqtyǵynyń 10%-yn dronmen nemese ekshn-kameralarmen túsirýge bolady. Shamdar, krandar, arbalar, «petlichkalar» jáne t.b. osyndai kez-kelgen óndiristik jabdyqtarǵa ruqsat etiledi.
Beine faildardyń júkteý júiesine júktelgen siltemesin jáne arnaiy formada toltyrylǵan ótinimdi festivaldiń MBfilmfest.kz@gmail.com elektrondyq poshtasyna jiberý kerek.
Qatysýshylardy tirkeý jáne jumystardy qabyldaý 2020 jyldyń 12 sáýirinen 15 mamyryna deiin júrgiziledi. MBff jeńimpazdary 2020 jyldyń 17 mamyrynda onlain formatta anyqtalady.
Baiqaýdyń tolyq sharttary fpp.kz saitynda «Baiqaýlar» bóliminde jáne mbfilmfest.com saitynda jariialanǵan.
