Foto: QR DSM
Almaty Balalar shuǵyl meditsinalyq kómek kórsetý ortalyǵy bazasynda eki biregei ota jasaldy. Endi otandyq ýrologtar men neirohirýrgtar birigip, qýyq qyzmetinde aqaýy bar balalarǵa kómektesetin bolady, dep habarlaidy Ult.kz.
Bul — bel aimaǵyna neirostimýliator-implant ornatý arqyly júrgiziletin ota, qurylǵy ótkizgish arqyly sakraldy júikemen bailanysady. Generator álsiz elektr impýlsin jiberip, júikeni yntalandyrady.
Nátijesinde yntalandyrýshy qýyqtyń jumysyn baqylaýǵa kómektesedi.
«Qazaqstanda balalarǵa mundai ota buryn-sońdy jasalmaǵan. Al sheteldik áriptesterimiz neiromodýliatsiiany kópten beri qoldanyp keledi. Onyń basty maqsaty – balalardyń ómir súrý sapasyn jaqsartý», – dedi ortalyqtyń neirohirýrgiia bólimshesiniń meńgerýshisi Rahym Aidaruly.
Pilottyq otany almatylyq dárigerler Belarýs elinen kelgen neiromodýliatsiia jáne fýnktsionaldyq neirohirýrgiia salasynyń sarapshysy Vladimir Alekseevetspen birlesip jasady.
«Naýqastardyń biri buǵan deiin irińdi paraproktitpen aýyrǵan, ókinishke qarai, onyń saldary retinde atoniialyq qýyq damydy – bul organnyń bulshyq etteriniń álsireýin bildiredi», – dep túsindirdi dáriger.
«Eger bala sirek zár shyǵarsa, bul keiinnen zár refliýksi men irińdi pielonefrit siiaqty aýyr asqynýlarǵa alyp kelýi múmkin. Máseleni sheshý úshin sakraldy elektrod pen neirostimýliatordy ornatý týraly sheshim qabyldandy – balany bul dertten qutqarýǵa áreket jasap kóremiz».
Ekinshi jaǵdai – julyn jaryǵy bar, zár men nájisti ustai almaityn 9 jastaǵy bala.
«Aitarym, mundai diagnoz kezinde bul – qolda bar sońǵy emdeý ádisi. Qazir jambas aǵzalarynyń jumysyn qalpyna keltiretin basqa ádis joq», – dep naqtylady neirohirýrg Vladimir Alekseevets.
Ota eki naýqasqa da ómir sapasyn jaqsartý jáne áleýmettený úshin jasaldy – olar mektepke baryp, qurdastarymen erkin aralasýy tiis.
«Nesepti ustai almaý jaǵdaiynda sakraldy stimýliatsiia» taqyrybyndaǵy búgingi master-klass – balalar neirohirýrgiiasy men ýrologiiasy salasyndaǵy naǵyz serpilis.
Balalar shuǵyl meditsinalyq kómek kórsetý ortalyǵynyń dárigerleri bul ádisti tájiribege engizip, kishkentai naýqastardyń deni saý bolyp ósýine kómektesýdi josparlap otyr.
