Parlament Májilisiniń jalpy otyrysynda «Mindetti áleýmettik saqtandyrý týraly» zań jobasy birinshi oqylymda maquldandy, dep habarlaidy QazAqparat tilshisi.
Zań jobasynyń negizgi maqsaty - eńbek ótili men áleýmettik tólem mólsheriniń arasyndaǵy ózara bailanysty kúsheitý, sondai-aq 2020 jyldan bastap eńbek etý qabiletinen, asyraýshysynan jáne jumysynan aiyrylýy boiynsha áleýmettik tólem mólsherlerin ortasha eseppen 30 paiyzǵa arttyrýdy qamtamasyz etý.
«Osy maqsattarǵa qol jetkizý úshin zań jobasynda Memlekettik áleýmettik saqtandyrý qorynan tólenetin 3 túrli áleýmettik tólemderdi taǵaiyndaý parametrlerin qaita qarastyrý kózdelgen. Birinshiden, eńbek ótili 5 jyldan asatyn tólem alýshylar úshin júiege qatysý ótiliniń koeffitsientin qaita qaraý usynylady. Bul koeffitsient 3 áleýmettik tólemniń mólsherin aiqyndaý kezinde qoldanylady. Búgingi kúni 5 jyl jáne odan kóp ótili bar azamattar úshin birdei koeffitsient (1,0) qoldanylyp keledi. Osylaisha júiege 5 jyldan kóp qatysqan adamdy yntalandyrý tetigi qarastyrylmaǵan. Júiege neǵurlym kóp qatysýdy yntalandyrý úshin 5 jyldan artyq qatysý ótili bar azamattarǵa árbir eńbek etken tolyq bir jyly úshin koeffitsientti 2 paiyzǵa arttyrý usynylady», - dedi Eńbek jáne halyqty áleýmettik qorǵaý ministri Berdibek Saparbaev.
Belgili bolǵandai, 2018 jyly mindetti áleýmettik saqtandyrý júiesine 5 jyldan kóp qatysqan azamattar sany 3,4 mln adamdy nemese qatysýshylardyń jalpy sanynyń (6,1 mln adam) 55 paiyzyn qurady. Sondyqtan, bul ózgeris tólem alýshylarǵa oń áserin tigizetin bolady.
«Ekinshiden, múgedektigi bar adamdardyń áleýmettik qorǵalý deńgeiin arttyrý maqsatynda eńbek etý qabiletinen aiyrylýy boiynsha áleýmettik tólemniń mólsherin tikelei meditsinalyq-áleýmettik saraptama negizinde belgilengen jalpy eńbek etý qabiletinen aiyrylý deńgeiine (30%-dan 100%-ǵa deiin) sáikes anyqtaý usynylady. Búgingi kúni eńbek etý qabiletinen aiyrylýdyń ortasha koeffitsienti qoldanylady, iaǵni múgedektigi bar adamdardyń naqty qajettiligi eskerilmeidi. Zań jobasynda osy máseleni retteý kózdelgen. Máselen, 65 paiyzǵa berilse, koeffitsient - 0,65, 80 paiyzǵa - 0,8, al 100 paiyzǵa berilse, koeffitsient 1-ge teń bolady», - dedi ministr.
«Mysaly, azamattyń ortasha ailyq tabysy 100 myń teńge. Ol 7 jyl jumys istep, áleýmettik aýdarymdary tólengen bolsa, onda eńbek etý qabiletinen 65 paiyzǵa airylǵan jaǵdaida, áleýmettik tólemniń mólsheri qoldanystaǵy formýla boiynsha 22 988 teńgeni, al Zań jobasyndaǵy jańa formýla boiynsha 31 080 teńgeni (ósim 35%) quraidy. Bul tólem Memlekettik áleýmettik saqtandyrý qorynan jumys istep, áleýmettik aýdarymdary tólengen azamattarǵa beriledi. Oǵan qosa, bazalyq deńgeiden múgedektigi boiynsha memlekettik járdemaqy qosa taǵaiyndalady, 2-shi toptaǵy múgedek úshin onyń mólsheri biylǵy jyly 45 438 teńgeni quraidy, sonda tólemniń jalpy somasy aiyna 76 518 teńge bolady», - dedi B. Saparbaev.
Ótken jyldyń qorytyndysy boiynsha jalpy eńbek etý qabiletinen aiyrylýy boiynsha áleýmettik tólemdi alýshylar sany 83,1 myń adamdy qamtydy. Tólemniń somasy 12,3 mlrd teńgegege jetti.
