QR Saýda jáne integratsiia, Aýyl sharýashylyǵy, Ulttyq ekonomika ministrlikteri Qazaqstan Respýblikasynda tótenshe jaǵdai kezinde «Áleýmettik mańyzy bar azyq-túlik taýarlaryna shekti bólshek saýda baǵasyn engizý týraly» birlesken buiryqqa qol qoidy, dep habarlaidy "Ult aqparat".
Elimizdiń Saýda ministrliginiń dereginshe, búgingi kúnnen bastap mynadai taýarlarǵa shekti baǵalar belgilendi: 1) birinshi sortty bidai uny, 2) birinshi sortty unnan jasalǵan bidai nany (pishindi), 3) makaron ónimderi (ólshenip salynatyn), 4) qaraqumyq jarmasy (dán, ólshenip salynatyn), 5) tazartylǵan kúrish (domalaq dándi, ólshenip salynatyn), 6) siyr eti (súiekti jaýyryn-tós bóligi), 7) taýyq jumyrtqasy (I sanatty), 8) kúnbaǵys maiy, 9) as tuzy («ekstra»-dan basqa).
«Sońǵy aida Qazaqstannyń azyq-túlik taýarlaryna degen suranysyn taldaý nátijesinde bul taýarlar eń kóp satyp alynatyny anyqtaldy. Soǵan bailanysty, osy jyldyń basynan bastap dál sol azyq-túlik baǵasy ósti. Baǵalar ár aimaqqa jeke belgilenedi. Nur-Sultan qalasynda 1-shi surypty unnan 1 keli nan eń kóp degende 150 teńge, Almatyda – 146 teńge, Shymkent qalasynda – 146 teńge turatyn bolady. Óńirlerde: Mańǵystaý oblysynda – bir keli nan úshin 164 teńge, Aqtóbe oblysynda – 147, Atyraý oblysynda – 164, Aqmola oblysynda – 160, Qostanai oblysynda – 139, Qyzylorda oblysynda – 143, BQO – 160, ShQO – 150, Pavlodar oblysynda – 161, SQO – 120, Almaty oblysynda – 144, Jambyl oblysynda – 138, Túrkistan oblysynda – 148. Qaraǵandy oblysynda shekti baǵalar eldi mekenderge bailanysty belgilengen. Onda 1 kg nannyń quny 142 teńgeden 160 teńgege deiin», - dep atap ótedi ministrlikten.
Vedomstvonyń atap ótýinshe, baǵa bir keli nan úshin belgilengen. Biraq, bir bólke nan – 550 gramm. Osylaisha, nan bólkesiniń quny, mysaly, Nur-Sultan qalasynda – 82,5 teńgeden, Almaty jáne Shymkent qalalarynda – 80,3 teńgeden aspaidy.
Áleýmettik mańyzy bar azyq-túlik taýarlaryna ruqsat etilgen shekti bólshek saýda baǵalarynyń mólsherin arttyrý 265 100 teńgeden 530 200 teńgege deiin aiyppul túrinde jazaǵa ákep soǵady.
