Qazaqstanda múmkindigi shekteýli azamattarǵa tehnikalyq quraldar men ońaltýǵa qajetti qyzmetterdi tańdaý múmkindigi beriledi. Bul úshin áleýmettik qyzmetter portaly iske qosylmaq, dep habarlaidy "Ult aqparat".
«Azamattardyń ótinishteriniń oryndalýyn qadaǵalaý bólimine múmkindigi shekteýli jandarǵa áleýmettik kómek kórsetý máselesi boiynsha ótinishter únemi túsip jatady. Osyǵan bailanysty biyl salalyq Eńbek jáne halyqty áleýmettik qorǵaý ministrliginiń tarapynan múgedek jandarǵa tehnikalyq quraldar men ońaltýǵa qajet qyzmetterdi óz betinshe tańdap, jeke kómekshiniń jumys kestesin rettep otyrýǵa múmkindik beretin áleýmettik qyzmetter portaly jumys istei bastaitynyn atap ótkimiz keledi», - delingen QR Prezidenti Ákimshiligi qoǵamdyq qabyldaýynyń Telegram-paraqshasynda jariialanǵan aqparatta.
Prezident Ákimshiligi qoǵamdyq qabyldaýynyń túsindirýinshe, jeke kómekshi – múgedek adamdy turatyn mekenjaiynan baratyn jerine deiin jáne qaita alyp keletin áleýmettik qyzmet kórsetýshi maman. Jeke kómekshi qyzmetine qol jetkizý úshin qozǵalyp-turýy qiyn birinshi toptaǵy múgedekter eńbekpen qamtý jáne áleýmettik baǵdarlamalar ortalyǵyna, «Azamattarǵa arnalǵan úkimet» memlekettik korporatsiiasyna, «Elektrondyq úkimet» veb-portalyna ótinish túsirýi kerek. Jeke kómekshiniń súiemeldep júrý qaǵazy onyń múgedekpen birge júrip, qansha ýaqyt jibergenin anyqtap, aqysyn tóleýge múmkindik beredi.
«Jeke kómekshi qyzmeti jergilikti biýdjet esebinen qarjylandyrylady. Ministrlik Qazaqstan Respýblikasyndaǵy múgedek jandardyń quqyqtaryn qamtamasyz etip, ómir sapasyn arttyrý maqsatyna bólingen qarjynyń qalai igerilip jatqanyn ai saiyn qadaǵalap, tekserip otyrady», - dedi qoǵamdyq qabyldaýdan.
