Qazaqstan boiynsha 730 eldi mekenniń ákimin anyqtaityn sailaý da máresine jetti. Zań boiynsha sailaý ótkizilgennen keiin úsh kún ishinde qorytyndy shyǵarylady, jeti kún ishinde sailanǵan ákimdi tirkeý júzege asyrylady, dep habarlaidy QazAqparat.
Jergilikti sailaý komissiialarynyń deregi boiynsha, Nur-Sultan ýaqytymen saǵat 20.00-de elimizdiń 9 óńirinde sailaý ýchaskeleri jabyldy.
Al saǵat 21.00 kezinde búkil respýblika boiynsha daýys berý aiaqtaldy.
Osylaisha, kezekti sailaý naýqanyna orai ashylǵan 14 óńirdegi 1847 sailaý ýchaskesi jumysyn qorytyndylap jatyr
Buǵan deiin habarlaǵanymyzdai, atalǵan 730 sailaý okrýginde 2582 kandidat usynylǵan.
Sonyń 2297-i tirkeýden ótken. Kandidattardyń basym bóligi – óz-ózin usynýshylar. Iaǵni, sailaý zańnamasyndaǵy jańa múmkindikti 1419 adam paidalanyp otyr.
Sondai-aq, 878 úmitkerdi Ádilet ministrliginiń tirkeýinde bar 6 saiasi partiia usynǵan.
Halyqtyń daýys berýi arqyly ákim bolǵysy keletinderdiń genderlik quramyna kelsek, er úmitkerlerdiń sany –1839. Solarmen birge 458 áiel úmitker baǵyn synady.
«Partiialyq emes baiqaý ortalyǵy» respýblikalyq qoǵamdyq birlestiginiń tóraǵasy Tólegen Kúnádilovtiń aitýynsha, birlestiktiń 2 myńnan astam ókili 1847 sailaý ýchaskesinde beitarap baqylaý júrgizgen.
«Dál qazir búkil málimetterdi ortalyqqa aldyryp, saraptap jatyrmyz. Negizgi qorytyndy keiin belgili bolady. Aldyn ala qorytyndy boiynsha, sailaý zańnamasyna, daýys berý protsesiniń ashyqtyǵyna nuqsan keltiretin óreskel qaishy áreketter bolǵan joq. Sailaý protsesine kedergi keltirmeitin, 10-ǵa jýyq eleýsiz aqaý tirkeldi. Biraq ol aqaýlar baiqaýshylardyń kózinshe dereý joiyldy», - deidi Tólegen Kúnádilov.
