Ekologiia, geologiia jáne tabiǵi resýrstar ministri Serikqali Brekeshev aqbókenderdiń sanyna qatysty suraqqa jaýap berdi, - dep habarlaidy Tengrinews.kz agenttigi.
Úkimet otyrysynan keiin jýrnalisterdiń suraqtaryna jaýap bergen ministr, Qazaqstandaǵy aqbóken sanynyń shamadan tys ósýine qatysty áli naqty sheshim qabyldanbaǵanyn aitty.
"Halyq joldaǵan usynystardy qarastyryp jatyrmyz. Iaǵni, aqbókenderdi basqa aimaqtarǵa májbúrlep kóshirý máselesi. Kóbisi basqa oblystarǵa kóshireiik dedi. Biraq, ókinishke orai, ǵylymi qoǵamdastyq bul sheshimdi tiimsiz jáne ruqsat etilmegen ádis dep tanydy", - dedi ministr.
Brekeshevtiń aitýynsha, halyq jibergen usynys arasynda qasqyrlar sanyn kóbeitý týraly usynys bolǵan, biraq bul aqbókender sanynyń azaiýyna kómektespeidi.
Sonymen qatar, ministr 2023 jylǵa qarai sporttyq-áýesqoilyq ań aýlaýdy uiymdastyrý máselesi qarastyryp jatqanyn aitty.
"Bul aqyly bolady. Buǵan deiin aqbóken Qyzyl kitapqa enbegeni aitylǵan bolatyn. 2023 jyldyń 1 qańtaryna deiin ań aýlaýǵa tyiym salyndy. Al bul másele qarastyrylyp jatyr. Qazan aiynyń sońyna deiin bir sheshimge kelemiz", - dep qorytyndylady Brekeshev.
