Qazaqstanda adamnyń qaitys bolǵany týraly kýálikti alý protsesteri jeńildedi. Bul týraly Tsifrlyq damý innovatsiialar jáne aeroǵarysh ónerkásibi ministri Baǵdat Mýsin jelidegi paraqshasynda jazdy, dep habarlaidy "Ult aqparat".
«Prezident Ákimshiliginde qyzmet etken kezde - pandemiia ýaqytynda Prezident máiithanalardyń janynda kóptegen adamdar jinalǵanyna nazar aýdardy. Biz onyń tapsyrmasy boiynsha talqylap, istiń mán-jaiyn anyqtadyq. Mekemeler arasyndaǵy biýrokratiiaǵa bailanysty qaitys bolǵany týraly kýálik alýdyń kúrdeli protsesteri bar. Osy protsesti ózgertý úshin men ony elektrondyq júiege aýystyrý bastamasyn kóterdim», - dedi ministr.
Onyń habarlaýynsha, barlyq memlekettik organdar (QR DSM, QR ÁM jáne QR BP QSjAEK) tolyq integratsiialaýdy jedel túrde pysyqtaǵan. Endi qaitys bolǵany týraly kýálikti alý boiynsha kúrdeli protsestiń ornyna eGov.kz portaldan bir anyqtamany alýǵa bolady. Bul servis birden birneshe anyqtamany joiady.
«Ókinishke qarai, pandemiia kezinde kópshiligimiz osy jaǵdaiǵa tap boldyq. Bizdiń mindetimiz osyndai qiyn kezeńde qajeti joq júrýdi jeńildetý boldy. Mundai protsesterdi avtomattandyrý mańyzdy. Sondyqtan biz qaǵazbastylyqty barynsha azaityp, barlyǵyn onlain rejimge kóshirýdi jalǵastyramyz», - dep jazdy Baǵdat Mýsin.
