QR Parlamenti Senatynyń Halyqaralyq qatynastar, qorǵanys jáne qaýipsizdik komiteti «Qazaqstandaǵy Ombýdsmen institýty: problemalary men perspektivalary» taqyrybyna arnalǵan dóńgelek ústel ótkizdi, dep habarlaidy "Ult aqparat" Senattyń baspasóz qyzmetine silteme jasap.
Sharaǵa Senat pen Májilis depýtattary, memlekettik organdardyń, ulttyq quqyq qorǵaý institýttarynyń, halyqaralyq uiymdardyń, ǵylymi qaýymdastyq pen azamattyq sektordyń ókilderi qatysty.
Dóńgelek ústel barysynda QR Prezidenti Qasym-Jomart Toqevtyń bastamasy boiynsha QR Adam quqyqtary jónindegi ýákil týraly arnaiy zań qabyldaý arqyly quqyq qorǵaý salasyn jetildirý máseleleri talqylandy.
QR Parlamenti Senaty Tóraǵasynyń orynbasary Asqar Shákirov otyrysty asha kelip, zań jobasyn ázirleýshiler óz jumysynda halyqaralyq oń tájiribeni jáne barshaǵa moiyndalǵan standarttardy, atap aitqanda Parij jáne Venetsiia qaǵidattaryn basshylyqqa alǵanyn atap ótti.
Ombýdsmenge aýqymdy ókilettikter men artyqshylyqtar berilýi sonymen birge mediatordyń qoǵam men bilik arasyndaǵy adam quqyqtaryna qatysty jaǵdaidy ádil jáne kásibi baǵalaýǵa qabiletti orynǵa ie bolýyn kózdeidi.
«Bul zańnyń qabyldanýyn elimizde júrgizilip jatqan saiasi jańǵyrtý men liberaldyq baǵyt turǵysynan qaraǵan jón. Jaqynda Memleket basshysy shyǵarǵan «Adam quqyqtary salasyndaǵy odan arǵy sharalar týraly» Jarlyq osy salanyń memleket úshin basymdyǵyn kórsetedi», - dep atap ótti Senat Tóraǵasynyń orynbasary.
Negizgi baiandama jasaǵan senator Qairat Qojamjarov qatysýshylardy zań jobasynyń negizgi erejelerimen tanystyrdy.
Atap aitqanda, Ombýdsmenniń mártebesin nyǵaitý, onyń táýelsizdigi men tiispeýge kepildik berý, shaǵymdardy qaraý kezindegi onyń ókilettikterin keńeitý, óńirlik ókildikterdi qurý, sondai-aq institýttyń qarjylyq derbestigin qamtamasyz etý atap ótildi.
Q.Qojamjarovtyń pikirinshe, «jalpy, zań jobasy Qazaqstan Respýblikasyndaǵy Adam quqyqtary jónindegi ýákil institýtynyń quqyq qorǵaý fýnktsiialaryn kúsheitedi».
Jan-jaqty pikir almasý aiasynda Parlamentaralyq Odaqtyń Vitse-prezidenti Akmal Saidov, QR Adam quqyqtary jónindegi ýákil Elvira Ázimova, Qazaqstandaǵy Adam quqyqtary jáne zańdylyqty saqtaý jónindegi halyqaralyq biýronyń direktory Evgenii Jovtis, BUU-nyń Adam quqyqtary jónindegi Joǵarǵy Komissary basqarmasynyń Ortalyq Aziiadaǵy óńirlik ókili Rishard Komenda jáne basqalar sóz sóiledi.
Halyqaralyq jáne otandyq quqyq qorǵaý qoǵamdastyǵynyń ókilderi osy saladaǵy zańnama jańalyqtaryn joǵary baǵalady.
Bul zań jobasy budan buryn QR Adam quqyqtary jónindegi ýákil janyndaǵy Sarapshylyq keńesi aiasynda saraptamalyq jáne ǵylymi qoǵamdastyqqa usynylǵan bolatyn, onda birqatar usynystar aitylyp, keiinnen zań jobasynyń mátininde kórinis tapqty.
Dóńgelek ústelge tóraǵalyq etken Halyqaralyq qatynastar, qorǵanys jáne qaýipsizdik komitetiniń tóraǵasy Muhtar Qul-Muhammed: «Qazirgi ýaqytta zań jobasy boiynsha quqyqtyq, lingvistikalyq jáne sybailas jemqorlyqqa qarsy saraptama alyndy. Sonymen birge zań jobasy Úkimettiń qaraýyna jiberilip, ony jariia talqylaý úshin QR Parlamenti Senatynyń saityna ornalastyryldy», - dedi.
