Aýyl sharýashylyǵy ministrligi bos jatqan jerlerdi memleket menshigine qaitardy, dep habarlaidy Sputnik Qazaqstan tilshisi.
Ministr Saparhan Omarovtyń aitýynsha, ótken eki jyldyń ishinde respýblika boiynsha maqsatty túrde paidalanylmai jatqan 7,6 million gektar aýyl sharýashylyǵy jeri bar ekeni anyqtalǵan. Sonyń ishinde 2 million gektar egistik pen 5,5 million gektar jaiylym bar.
"Qabyldanǵan sharalardyń arqasynda 2,0 million gektardy jer ýchaskeleriniń burynǵy ieleri men jer paidalanýshylary igere bastady. Al 3,7 million gektar jer memleket menshigine qaitaryldy. Sonyń ishinde 3,0 million gektar aýyl sharýashylyǵy ainalymyna tartyldy jáne 0,7 million gektardy búgingi kúni aýyl sharýashylyǵyna tartý jumystary júrgizilýde", - dedi Omarov esep berý kezdesýi kezinde.
Ministrdiń sózine qaraǵanda, qalǵan 1,9 million gektar jer boiynsha jergilikti atqarýshy organdar belgilengen tártippen memleket menshigine qaitarý sharalaryn atqaryp jatyr.
"Jerdi paidalanýdy baqylaý sharalary túbegeili ózgeredi. Endi tekserister jii júrgiziledi. Áitpese, buryn bes jylda bir ret qana tekseris jasaldy. Ondaida ieleri úsh jyl boiy jerdi paidalanbai jatady, sońǵy eki jylda igerip, jumys istegendei bolady", - dep atap kórsetti Omarov.
Esterińizge sala keteiik, ótken jyldyń sáýirinde parlament jer daýynan keiin ázirlengen zańdy qabyldaǵan bolatyn. Zańǵa sáikes, aýyl sharýashylyǵy jerlerin qazaqstandyqtarǵa jalǵa berýdiń jańa ári arnaiy tártibi qarastyrylyp otyr. Jer ýchaskeleri konkýrsqa qoiylatyn jerler tizbesine sáikes beriledi.
Jerlerdi tiimdi paidalaný úshin talaptar kúsheitilmek. Osy maqsatta zań jobasynda turaqty monitoring júrgizý kózdelgen. Jaldaý ýaqytynyń alǵashqy 5 jylynda – jyl saiyn, odan keiingi kezeńderde sýarmaly egistikte – 3 jyl saiyn, tálimdi jerlerde – 5 jyl saiyn júrgiziletin bolady. Jaldaý shartyndaǵy mindetterdiń biri oryndalmaǵany anyqtalǵan jaǵdaida kelisimshartty ókiletti organ bir jaqty buzýǵa quqyly.
