Qazaqstanda 4 myńnan astam mektep erekshe kútimdi qajet etetin balalardy qabyldaýǵa daiyn, dep habarlaidy QazAqparat tilshisi.
Bul týraly QR Eńbek jáne halyqty áleýmettik qorǵaý ministriniń orynbasary Svetlana Jaqypova aitty.
«Balalarǵa bilim berý uiymdaryn qoljetimdi etýde alǵa ilgerileýshilik bar. Elimizde 4 myńnan astam uiym erekshe qajettiligi bar balalardy qabyldaýǵa daiyn. Eń bastysy olardyń erekshelikterine qarai belgili bir bilim berý bazasyn qalyptastyrý kerek. Bul úshin arnaiy bilim berý baǵdarlamalaryn jasap, olarmen jumys istei alatyn pedagog mamandardy ázirleýdi usynamyz. Onlain-oqytýdy qolǵa alý kerek. Búginde Qazaqstanda 15 myńnan astam bala úiden oqidy. Bul - jaqsy kórsetkish emes», - dedi vitse-ministr Úkimette ótken baspasóz máslihatynda.
Sonymen birge, S. Jaqypova inkliýzivti bilim berý aiasynda múmkindigi shekteýli balalarǵa jaǵdai jasap, olardy áleýmettendirýdi usyndy.
«Dál osy maqsatta Bilim jáne ǵylym, Densaýlyq saqtaý ministrlikterimen birigip, úiden oqityn balalardyń syrqattar tizimi jasalady. Eger balanyń mektepke barýǵa shamasy jetse, qatarlastarymen birge mektepke barýy tiis. Al mektepke bara almaǵan balalardy qashyqtyqtan oqý protsesine qatystyrýymyz kerek. Bul platforma bilim berýdiń barlyq deńgeiinde - mektep, kolledj jáne ýniversitetterde júzege asyrylady», - dedi ol.
Sondai-aq, vitse-ministr múgedek balasy bar otbasyǵa airyqsha mártebe berý týraly depýtattar usynysyna pikir bildirdi.
«Ministrlikte bul másele birneshe ret kóterilgen. Airyqsha mártebe berýdiń ar jaǵynda belgili bir jeńildikter, tólemder jatqanyn bilesizder. Qazir de memleket múgedek bala tárbielep otyrǵan otbasyǵa járdemaqy beredi. 2019 jyldyń 1 shildesinde bul járdemaqy taǵy 30 paiyzǵa ósedi. Iaǵni, qazir 31 myń teńgeden tólenip jatqan járdemaqy shildeden bastap, 41 578 teńgege kóteriledi. Atalǵan jumystar aiasynda jol kartasy ázirlenedi jáne airyqsha mártebe berý máselesi de kún tárbitinde turady», - dep jaýap berdi S. Jaqypova jýrnalister suraǵyna.
Sonymen qatar ol múgedek balalardy tárbielep otyrǵan analardy zeinetaqymen qamsyzdandyrý máselesin kóterdi.
«Kei analar múgedek balany tárbieleýge beriletin 41 myń teńge járdemaqynyń 10 paiyzyn zeinetaqyǵa ustap qalsyn degen usynystar aitty. 4 myń teńgeden 20 jyl boiy jinasań da, eleýli qarajat shyqpaidy. Sosyn 1998 jylǵa deiin jumys istemegen, odan keiin múgedek bala tapqan áielderde de tiisti zeinetaqy jinaǵy joq. Sondyqtan, mundai analarǵa zeinetaqy tólemderin tóleýdi qarastyryp otyrmyz», - dep túsindirdi vitse-miinstr.
"Máselen, bizde alty birdei múgedek balany tárbielep otyrǵan ana bar. Ondai otbasy bireý ǵana. Olarǵa járdemaqy tólenedi. Qazir ol anaǵa osy sanattaǵy balaǵa qaraǵany úshin 31 000 teńgeden tóleimiz. Oǵan qosa, olar 41 000 teńgeni balanyń múgedektigi úshin alady. Jalpy, shildeden bastap múgedek balalarǵa beriletin járdemaqy óskennen keiin atalǵan otbasy ai saiyn ortasha eseppen 82 000 teńge alatyn bolady", - dedi Jaqypova úkimet úiinde ótken baspasóz máslihatynda.
Sputnik Qazaqstan tilshisine bergen suqbatynda vitse-ministr bul anany qabyldap, máseleniń mán-jaiyn suraǵanyn da jetkizdi.
"Men ol anany Nur Otan partiiasynda ózim qabyldadym. Sol kezde altynshy balaǵa aiaǵy aýyr bolǵan. Joldasy joq. Sonda bul balalardyń ákeleri kim ekenin suraǵan bolatynmyn. Ol meniń olai suraýǵa quqym joq ekenin aitty. Alla taǵala berdi. Sondyqtan men týa beremin dep jaýap berdi. Biraq ol ana týraly aqparatty bere almaimyn. Sebebi bul qupiia málimet sanalady", - dep atap ótti ol.
Jaqypovanyń sózine qaraǵanda, elimizde tórt múgedek balany tárbielep otyrǵan ana da bar. Biraq ol - patronatty otbasy. Olar elordada emes, basqa aimaqta turady.
Aita keteiik, Qazaqstanda 685 myńnan astam múgedektigi bar adam ómir súredi, onyń 421 myńy - eńbekke qabiletti jasta, 176 myńy - zeinet jasynda al 18 jasqa deiingi bala sany - 88 myń.
Ótken aida múgedektigi bar adamdardyń turmys sapasyn jaqsartýǵa baǵyttalǵan 7 jyldyq ulttyq jospar qabyldandy. Bul jospar 7 baǵytta - múgedektikti aldyn alý men profilaktika, inkliýzivti bilim berý jáne bilimniń qoljetimdiligi, kedergisiz orta, ekonomikalyq derbestik jáne sapaly jumyspen qamtý, áleýmettik ońaltý men abilitatsiiany damytý; áleýmettik qyzmetter kórsetý júiesin jańǵyrtý jáne qoǵamdyq sanany jańǵyrtý boiynsha júzege asyrylady.
