Elimizde tirkelgen 3,9 mln avtomobildiń 64 paiyzynda paidalaný merzimi 10 jyldan asqan. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aityp berdi, dep habarlaidy QazAqparat.
«Qazirgi ýaqytta avtokólik atmosferalyq aýany lastaýdyń negizgi kózderiniń biri bolyp otyr. Onyń sebepteriniń biri – avtokólik quraldarynyń tozýy. Tirkelgen 3,9 mln avtomobildiń ishinde paidalaný merzimi 10 jyldan asqan 2,5 mln kólik bar. Iaǵni 64% quraidy», - dedi Maǵzum Myrzaǵaliev búgingi Úkimet otyrysynda.
Ministrdiń aitýynsha, ótken jyldyń sońynda «Tehnikalyq retteý týraly» Zańy qabyldanyp, janar-jaǵarmai quiý beketterindegi otynnyń sapasyn K4 jáne K5 ekologiialyq synyptaryna sáikestigine baqylaý kúsheitildi.
«Osyǵan bailanysty, Saýda jáne integratsiia ministrligine janar-jaǵarmai quiý beketterindegi otynnyń sapasyn baqylaýdy júzege asyrý qajet dep sanaimyz. Budan basqa, tehnikalyq baiqaý stantsiialary men avtokólik ieleriniń jaýapkershiligin kúsheitý óte mańyzdy. Óz kezeginde ákimdikter avtoparkterdi jańartý jumystaryn jalǵastyrýy qajet», - dedi Myrzaǵaliev.
Buǵan deiin Ekologiia ministri óńirlerdegi ekologiialyq problemalar qalai sheshilip jatqanyn baiandaǵan edi.
