Elimizdegi aqparat jáne kommýnikatsiialar ministrligine aldaǵy jaqyn ýaqytta 5G uialy bailanysy tehnologiiasyna pilottyq testileý júrgizý úshin bailanys operatoryn anyqtaý kerek bolyp tur. Bul jóninde búgingi Úkimet otyrysynda vedomstvo basshysy Dáýren Abaev málimdedi, dep habarlaidy Baq.kz tilshisi.
«Álemdik tájiribe kórsetkendei, uialy bailanys standarttarynyń jańa býyny ár 10 jyl saiyn ázirlenip otyrady. 1981 jyly birinshi standart – 1G, 1992 jyly - 2G, 2001 jyly - 3G jáne 2010 jyldyń aiaǵynda - 4G engizildi. 2020 jylǵa qarai 5G standartyn engizý kútilýde. 5G uialy bailanysyn Qazaqstan Respýblikasynyń aýmaǵyna engizý Halyqaralyq elektrobailanys odaǵynyń 5G standartyn qabyldanǵannan keiin múmkin bolady. 2019 jyly Egipettiń Sharm-esh-Sheih qalasynda ótetin Dúniejúzilik radiobailanys konferentsiiasynda osy sheshimdi qabyldaý josparlanǵan», - dedi ministr.
Abaevtyń aitýynsha, Halyqaralyq elektrobailanys odaǵy 5G standartyn qabyldaǵannan keiin ǵana telekommýnikatsiialyq jabdyqtardyń óndirýshiler qabyldanǵan standart boiynsha jumys isteitin tiisti qurylǵylardy jappai óndirýdi bastaidy.
«Óz kezeginde Ministrlik 2019 jyldyń 2 toqsanynda 5G uialy bailanys tehnologiiasyn pilottyq testileýden ótkizýdi josparlap otyr. 5G uialy bailanysyn pilottyq testileý úshin Ministrlik jiilikterdi irikteý jumysyn Astana, Almaty qalalarynda jáne Aqmola, Almaty oblystarynda júrgizip jatyr. Sonymen birge, Qorǵanys ministrligimen kelisilgen jiilik resýrstary operatorlardyń bireýinde ǵana 5G tehnologiiasyn testileýden ótkizý jetkilikti. Iaǵni, Ministrlik jýyq arada 5G mobildi bailanys tehnologiiasyn pilottyq testileýden ótkizý úshin bailanys operatoryn anyqtaýy qajet», - dedi Abaev.
Vedomstvo basshysy jalpy, 5G standarty ne úshin qajet ekenine de toqtalyp ótti.
«Bul eń aldymen joǵary jyldamdyqtaǵy internetpen qamtamasyz etedi. Keibir sarapshylar 5G qosylǵan jaǵdaida pilotsyz kólikter júrgizýge múmkindik paida bolatynyn aityp otyr. Mysaly úshin: bul 4G mobildi bailanys tehnologiiasymen salystyrǵanda jyldamdyǵy 40 ese kóp tehnologiiany usynady. Internet esh kedergisiz jumys istegen jaǵdaida kóptegen artyqshylyqtarǵa qol jetkizemiz. Densaýlyq saqtaý salasynda naqty ýaqyt rejiminde qashyqtyqtan kúrdeli operatsiialar júrgizý úshin qoldanýǵa bolady. Qaýipti aimaqtarda, iaǵni, ken ornynda nemese qurylys barysynda ekskavatordy, krandy kabinette nemese ortalyq basqarý bólmesinde otyryp-aq belgili qashyqtyqtan basqarýǵa múmkindik týady», - dep túiindedi ministr.
