2025 jylǵa qarai sportpen júieli túrde ainalysatyn adamdardyń sanyn 35 paiyzǵa deiin arttyrý sharalary qabyldanady. Bul týraly QR Mádeniet jáne sport ministri Aqtoty Raiymqulova málim etti, dep habarlaidy QazAqparat.
«Búgingi tańda dene shynyqtyrý jáne sportpen júieli túrde shuǵyldanatyndar sanynyń turaqty ósý úrdisi baiqalady. 2019 jyldyń qorytyndysy boiynsha olardyń sany 5,7 mln adamdy nemese 30,6 paiyzdy qurady. Bul rette Qazaqstannyń álemniń damyǵan 30 eliniń qataryna kirýin qamtamasyz etý úshin dene shynyqtyrý jáne sportpen júieli túrde ainalysatyn adamdardyń sanyn 2025 jylǵa qarai 35 paiyzǵa deiin arttyrý sharalaryn qabyldaýymyz qajet. Sebebi buqaralyq sport milliondaǵan adamdarǵa olardyń fizikalyq qasietteri men dene múmkindikterin jaqsartýǵa, densaýlyǵyn nyǵaityp, ómirlerin uzartýǵa múmkindik beredi», - dedi A. Raiymqulova Parlament Májilisindegi Úkimet saǵatynda.
Onyń sózine qaraǵanda, salaýatty ómir saltyn nasihattaý men buqaralyq sportty damytýdyń aiasynda 2019 jyly jalpy sany 6,8 mln adamdy qamtyǵan 53 myń is-shara ótkizildi.
Budan buryn habarlanǵandai, Májilistegi úkimet saǵatynda depýtat Gúlmira Isimbaeva halqynyń 60 paiyzǵa jýyǵy sportpen ainalysatyn AQSh, Japoniia, Kanada siiaqty eldermen jáne Eýropa elderimen, halqynyń 55 paiyzynyń sportpen shuǵyldanatyn Reseimen salystyrǵanda, Qazaqstannyń kórsetkishi tómen deńgeide ekenin atap ótti.
