Sońǵy jeti jylda elimizde jasóspirimder qylmysy 64%-ǵa qysqardy. Bul týraly Ishki ister ministrligi málimdedi, dep habarlaidy QazAqparat.
«Ótken jyly kámeletke tolmaǵandar arasynda qylmys úshten birge qysqardy. Olar jasaǵan urlyq sany 39%-ǵa, tonaý 54%-ǵa, qaraqshylyq 79%-ǵa jáne buzaqylyq 25%-ǵa azaidy. Ádettegidei, kámeletke tolmaǵandardyń qylmys jasaýynyń basty sebebi – balalarǵa tiisti baqylaýdyń bolmaýy. Jyl saiyn politsiia organdaryna 100 myńǵa jýyq bala jetkiziledi. Olardyń kópshiligi túngi ýaqytta turǵyn úiden tys jáne oiyn-saýyq mekemelerinde zańdy ókildersiz júrgen jasóspirimder bolǵan», - dedi QR IIM Ákimshilik politsiia komiteti tóraǵasynyń orynbasary Aleksei Miliýk IIM-de ótken onlain-brifing barysynda.
Onyń aitýynsha, 2020 jyly 65 myńnan astam ata-ana ákimshilik jaýapkershilikke tartyldy, olar balalaryna túngi ýaqytta kóshede jáne oiyn-saýyq oryndarynda júrýge jol bergen.
«Sonymen birge, kafeler men meiramhanalardyń 800-den astam iesi osyndai kámeletke tolmaǵandardyń júrgeni úshin ákimshilik jaýapkershilikke tartyldy. 4 myńnan astam jasóspirimdi ata-analaryna berý múmkin bolmaǵandyqtan, kámeletke tolmaǵandardy qaraýsyz qaldyrǵany úshin beiimdeý ortalyqtaryna jiberildi. Búginde politsiia esebinde quqyqbuzýshylyq jasaýǵa beiim 5 myńnan astam kámeletke tolmaǵan bala tur. Olarmen jeke-profilaktikalyq jumystar júrgizilýde», - dedi A. Miliýk.
