Qazaqstanda 480 kásiptik standart ázirlendi. Bul týraly búgin QR Eńbek jáne halyqtyq áleýmettik qorǵaý ministri Birjan Nurymbetov aitty, dep habarlaidy QazAqparat.
«35 salalyq baǵytqa júrgizilgen saraptamanyń qorytyndysy boiynsha 6106 kásip anyqtaldy. Al 480 kásiptik standartty ázirleý arqyly 2784 kásipti jabý josparlanyp otyr», - dedi ministr QR Premer-Ministri Asqar Maminniń tóraǵalyǵymen ótip jatqan Kásiptik standarttar ázirleý máseleleri jónindegi ulttyq keńes otyrysynda.
Onyń atap ótýinshe, 2018 jyly josparlanǵan 550 kásiptik standarttyń 70-i bekitilgen. Biyl ministrlik 36 salalyq biliktilik jáne 35 salalyq baǵyt boiynsha 480 kásiptik standart ázirleý kelisimshartyn jasasqan. Osyǵan orai «Eńbek resýrstaryn damytý ortalyǵy» AQ bazasynda jobalyq keńse qurylǵan.
Munan bólek, 11 memlekettik organnyń janynda vitse-ministrlerdiń jetekshiligimen jobalyq toptar jumys isteidi. Olardyń quramyna salalyq qaýymdastyqtardyń, Ulttyq palatanyń, jetekshi salalyq kásiporyndardyń, bilim ordalarynyń ókilderi kiredi.
«Kásiptik standart ázirleý sapasyna baqylaý qamtamasyz etildi. 4 jeltoqsandaǵy jaǵdaiǵa sáikes, 36 salalyq biliktilik shegi bekitilip, 480 kásiptik standart ázirlendi. 391 kásiptik standart Ulttyq palatanyń bekitýine tústi», - dedi B.Nurymbetov.
