Elimizde jeke kýáliksiz ómir súrip júrgen 4686 adam anyqtaldy, dep habarlaidy QazAqparat.
«Bizdiń ministrlik ótken jyldyń qazan aiynan bastap Úkimettik emes uiymdar, adam quqyǵy jáne zańdylyqty saqtaý týraly halyqaralyq biýro jáne «Sezim – áielder bastamasy» quqyq ortalyǵymen birlesip, el aýmaǵynda jeke qujatsyz júrgen azamattardy anyqtaý maqsatynda keń aýqymdy aktsiia uiymdastyrdy. Aktsiianyń nátijesinde Qazaqstanda qujatsyz 4686 adam anyqtaldy. Olar negizinen Almaty, Qaraǵandy, Túrkistan, Aqmola jáne Jambyl oblystarynda turǵan. Búginde qujatsyz osy azamattardyń 3408-ne jeke kýálik berildi. Al qalǵan 1278 adamdy qujattandyrý jumysy júrip jatyr», - dedi QR IIM Kóshi-qon komiteti tóraǵasynyń orynbasary Sabyrjan Seiitjanov Ortalyq kommýnikatsiialar qyzmetinde ótken baspasóz máslihatynda.
Sondai-aq, Kóshi-qon komitetiniń ókili qujatsyz júrgenderge jeke kýálikti qalai alýǵa bolatyndyǵy týraly keńesimen bólisti.
«Adamdar ómirdegi túrli jaǵdailardyń saldarynan qujatsyz qalýy múmkin. Qandai jaǵdaida bolmasyn kez kelgen adamnyń jeke kýáligi bolýy tiis. Onsyz eshqandai kómek, qoldaý ala almaidy, tipti jumysqa da tura almaidy. Demek, qujatsyz adam ne isteý kerek? Elimizdiń barlyq aimaǵynda Kóshi-qon komitetiniń bólimsheleri bar. Aldymen sol jerge baryp, azamat óziniń qujatsyz júrgenin aitý kerek. Sol jerdegi mamandar ol azamattyń mártebesin anyqtap, ýaqytsha qujat bere alady. Sodan soń azamatqa qatysty tolyq jaǵdai anyqtalyp, onyń nelikten qujatsyz júrgeni anyqtalǵan soń resmi túrde Qazaqstannyń azamaty ekenin dáleldeitin jeke kýálik beriledi», - deidi ol.
