Qazaqstandyqtar dári-dármektiń shekti baǵasyn birneshe aqparat kózinen bile alady, dep habarlaidy QazAqparat.
«Biz zańnamany jetildirý baǵytynda negizgi jumysty júrgizdik. Atap aitqanda, dári-dármek pen meditsinalyq buiymdardyń ainalymy boiynsha jumys retke keltirildi. Ózderińiz biletindei, dárihanalardaǵy dári-dármektiń baǵasyn retteý quzyreti Densaýlyq saqtaý ministrligine berilip, baǵany retteý erejeleri bekitilgen bolatyn. Qazirgi ýaqytta kóterme-bólshek saýda kezinde dári-dármektiń 4 myń túri boiynsha shekti baǵa bekitildi», - dedi QR Densaýlyq saqtaý ministrligi Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraiymy Liýdmila Biýrabekova OKQ-da ótken baspasóz máslihatynda.
Komitet basshysynyń aitýynsha, dári-dármektiń shekti baǵa boiynsha tizimin Densaýlyq saqtaý ministrliginiń, komitettiń, aýmaqtyq departamentterdiń, Ulttyq saraptaý ortalyǵynyń saitynan jáne «DDari.kz mobildi qosymshasynan bilýge bolady.
«Iaǵni, osy aqparat kózderinen 4000 túrli dári-dármektiń bekitilgen baǵasyn bilýge bolady. Óndirýshilerdiń bári baǵa boiynsha ótinimin berip úlgergen joq. Sol sebepti, osy aidyń sońyna deiin taǵy 1500 dári-dármek túriniń shekti baǵasy bekitiledi», - dedi Liýdmila Biýrabekova.
