QR Premer-Ministri Asqar Maminniń tóraǵalyǵymen ótken Investitsiialyq ahýaldy jaqsartý jónindegi keńes otyrysynda Qazaqstannyń farmatsevtikalyq qaýipsizdigin qamtamasyz etý máseleleri qaraldy, dep habarlaidy "Ult aqparat" Úkimet basshysynyń resmi saityna silteme jasap.
Qazaqstanda tirkelgen Kanada elshisi Nikolia Brýsso, Ulybritaniia elshisi Maikl Gifford, AQSh elshisiniń orynbasary Teodor Ling, ýaqytsha senimdi ókil, Shveitsariia elshiligi missiiasynyń basshysy Stefan Kletzli, AQSh Úkimetiniń meditsinalyq zertteýler jáne ázirlemeler jónindegi uiymynyń qyzmetkeri Donald Taýnsend, sondai-aq Pfizer, Johnson&Johnson, Dr.Reddy’s Laboratories, Microsoft kompaniialarynyń ókilderi QR-da farmatsevtika ónerkásibin damytý perspektivalary týraly baiandama jasady. Qazaqstan tarapynan densaýlyq saqtaý birinshi vitse-ministri Marat Shoranov túsinikteme berdi. Sheteldik ókilder Qazaqstannyń pandemiiamen kúres jáne farmatsevtikalyq qaýipsizdikti qamtamasyz etý boiynsha qabyldap jatqan sharalaryna joǵary baǵa berdi, sondai-aq QR densaýlyq saqtaý júiesin jáne dárilik preparattar men meditsinalyq jabdyqtardy jetkizý tizbegin odan ári jetildirý boiynsha birqatar usynymdar aitty.
«Qazirgi pandemiiaǵa jáne bolashaq epidemiologiialyq syn-tegeýrinderge qarsy kúreste el áleýetin odan ári arttyrý maqsatynda Farmatsevtikalyq jáne meditsinalyq ónerkásipti damytýdyń 2020-2025 jyldarǵa arnalǵan keshendi jospary qabyldandy», — dedi A. Mamin.
Qujat 2025 jylǵa qarai otandyq farmatsevtikalyq preparattar óndirisin 92-den 230 mlrd teńgege deiin 2,5 esege arttyrýdy kózdeidi. Otandyq farmatsevtikalyq ónimniń ishki naryqtaǵy úlesi zattai kóriniste 50%-ǵa deiin artady. Jospardy iske asyrý aiasynda biznestiń klinikalyq jáne klinikaǵa deiingi synaqtar júrgizýge jumsalǵan shyǵyndaryn óteý, negizgi taýar pozitsiialaryn, áleýetti taýashalardy, sondai-aq sheteldik investorlar úshin investitsiialyq usynystardy aiqyndaý sekildi sharalar qabyldanady. Naqty patsientke deiin dári-dármekter logistikasynyń barlyq kezeńderinde dárilik zattar men meditsinalyq buiymdardy mindetti tańbalaý men olardyń qadaǵalanýyn kezeń-kezeńimen engizý kózdelgen.
«Investitsiialardy tartý – QR farmatsevtikalyq ónerkásibin damytý boiynsha alǵa qoiylǵan maqsattarǵa qol jetkizýdiń negizgi quraly. Qazaqstan aýmaǵynda farmatsevtikalyq ónim óndirisin jergiliktendirýdi qamtamasyz ete otyryp, 30 sheteldik kompaniiany tartý boiynsha jumys júrgizilýde», - dedi A. Mamin.
