Qazaqstanda úsh ýniversitettiń bilim berý qyzmetine akkreditatsiiasy qaitaryp alyndy, dep habarlaidy "Ult aqparat" bilim jáne ǵylym ministrligine silteme jasap.
«Ortalyq Aziia ýniversiteti, «Astana» ýniversiteti jáne Aqtaý gýmanitarlyq-tehnikalyq ýniversitetiniń akkreditatsiialary keri qaitaryldy. Sebebi, bul joǵary oqý oryndary bilim berý sapasynyń akkreditteý standarttaryn saqtamaǵan. Osyǵan bailanysty Táýelsiz qazaqstandyq akkreditteý ortalyǵy men Akkreditteý jáne reitingtiń táýelsiz agenttigi atalǵan joǵary oqý oryndarynyń akkreditatsiiasyn qaitaryp aldy. Endi bul ýniversitetter joǵary bilim týraly qujattardy bere almaidy, sonymen qatar stýdentterdi de qabyldaýǵa quqyǵy joq», delingen habarlamada.
Vedomstvonyń málimdeýinshe, «Astana» ýniversiteti men Aqtaý gýmanitarlyq-tehnikalyq ýniversitetinde budan buryn da akkreditatsiialaý barysynda qiyndyqtar bolǵan.
«Biz osy ýniversitettermen sottasyp júrgenimizge bir jyldan asty. Anyqtalǵan zań buzýshylyqtarǵa bailanysty qazir olardy bas litsenziiadan aiyrý sharalary qabyldanyp jatyr. Sońǵy úshinshi tekserý qaldy. Osy joǵary oqý oryndarynyń stýdentteri, ata-analar men oqytýshylarynan shaǵymdar túskenin aita ketken jón. Olar bilim sapasynyń joqtyǵy, oqytýshylar men ǵylymi jetekshilerdiń jetispeýshiligi, sondai-aq diplomnyń ýaqytyly berilmeýine shaǵymdandy. Endi diplom alý úshin stýdentter basqa joǵary oqý oryndaryna aýysa alady. Ol úshin biz JOO qyzmetiniń úlgilik qaǵidasyna ózgeris pen tolyqtyrýlar engizdik», delingen habarlamada.
Ministrliktiń málimetinshe, talapkerler bul oqý oryndaryna grantqa túse almaidy, al túlekter diplom almaidy. Mundai jaǵdaida stýdentter tek basqa ýniversitetterge aýysý arqyly ǵana tyǵyryqtan shyǵa alady.
«Atalǵan joǵary oqý oryndaryndaǵy bilim alýshylardyń sany osy ýaqyt ishinde aitarlyqtai tómendedi. Ulttyq bilim berý derektor qorynyń aqparatyna sáikes, Ortalyq Aziia ýniversitetindegi biylǵy oqý jylyndaǵy stýdentterdiń sany 3 070-ten 636-ǵa deiin, «Astana» ýniversitetinde – 1 162-den 480-ge deiin, Aqtaý gýmanitarlyq-tehnikalyq ýniversitetinde – 1 207-den 398-ge deiin azaiǵan», - dedi QR BǴM Bilim jáne ǵylym salasyndaǵy sapany qamtamasyz etý komitetiniń tóraiymy Gúlzat Kóbenova.
Komitet túlekter men jumys berýshilerge JOO-nyń ózindik úlgidegi diplomdardyń seriiasy, nómiri jáne QR kody bolatynyn nazar aýdarýyn surady.
«Diplomdar seriiasyn QR BǴM bekitedi. Diplom nómirlerin generatsiialaý arnaiy servis arqyly júzege asyrylady. Onyń kómegimen joǵary oqý oryndary seriialardy jáne rettik nómirlerdi, sondai-aq QR kodty alady. Sondai-aq talapkerler men ata-analardy JOO-nyń oqytý sapasy, oqý ornynyń infraqurylymy men oqytý tásilderin zerdelei otyryp, joǵary oqý oryndaryn tańdaýǵa asqan jaýapkershilikpen qaraýǵa shaqyramyz», delingen habarlamada.
Sonymen birge vedomstvo bastamasymen «Atameken» UKP ótkizetin joǵary oqý oryndarynyń resmi reitingine nazar aýdarý qajet. Reiting jumys berýshilerdiń bilim berý baǵdarlamalarynyń mazmuny men qazaqstandyq joǵary oqý oryndary túlekteriniń suranysqa ie bolýyn eskere otyryp jasalǵan. Reitingine BǴM jáne «Atameken» UKP saittarynan qaraýǵa bolady.
