قازاقستاندا ٷش ۋنيۆەرسيتەتتٸڭ بٸلٸم بەرۋ قىزمەتٸنە اككرەديتاتسيياسى قايتارىپ الىندى, دەپ حابارلايدى "ۇلت اقپارات" بٸلٸم جەنە عىلىم مينيسترلٸگٸنە سٸلتەمە جاساپ.
«ورتالىق ازييا ۋنيۆەرسيتەتٸ, «استانا» ۋنيۆەرسيتەتٸ جەنە اقتاۋ گۋمانيتارلىق-تەحنيكالىق ۋنيۆەرسيتەتٸنٸڭ اككرەديتاتسييالارى كەرٸ قايتارىلدى. سەبەبٸ, بۇل جوعارى وقۋ ورىندارى بٸلٸم بەرۋ ساپاسىنىڭ اككرەديتتەۋ ستاندارتتارىن ساقتاماعان. وسىعان بايلانىستى تەۋەلسٸز قازاقستاندىق اككرەديتتەۋ ورتالىعى مەن اككرەديتتەۋ جەنە رەيتينگتٸڭ تەۋەلسٸز اگەنتتٸگٸ اتالعان جوعارى وقۋ ورىندارىنىڭ اككرەديتاتسيياسىن قايتارىپ الدى. ەندٸ بۇل ۋنيۆەرسيتەتتەر جوعارى بٸلٸم تۋرالى قۇجاتتاردى بەرە المايدى, سونىمەن قاتار ستۋدەنتتەردٸ دە قابىلداۋعا قۇقىعى جوق», دەلٸنگەن حابارلامادا.
ۆەدومستۆونىڭ مەلٸمدەۋٸنشە, «استانا» ۋنيۆەرسيتەتٸ مەن اقتاۋ گۋمانيتارلىق-تەحنيكالىق ۋنيۆەرسيتەتٸندە بۇدان بۇرىن دا اككرەديتاتسييالاۋ بارىسىندا قيىندىقتار بولعان.
«بٸز وسى ۋنيۆەرسيتەتتەرمەن سوتتاسىپ جٷرگەنٸمٸزگە بٸر جىلدان استى. انىقتالعان زاڭ بۇزۋشىلىقتارعا بايلانىستى قازٸر ولاردى باس ليتسەنزييادان ايىرۋ شارالارى قابىلدانىپ جاتىر. سوڭعى ٷشٸنشٸ تەكسەرۋ قالدى. وسى جوعارى وقۋ ورىندارىنىڭ ستۋدەنتتەرٸ, اتا-انالار مەن وقىتۋشىلارىنان شاعىمدار تٷسكەنٸن ايتا كەتكەن جٶن. ولار بٸلٸم ساپاسىنىڭ جوقتىعى, وقىتۋشىلار مەن عىلىمي جەتەكشٸلەردٸڭ جەتٸسپەۋشٸلٸگٸ, سونداي-اق ديپلومنىڭ ۋاقىتىلى بەرٸلمەۋٸنە شاعىمداندى. ەندٸ ديپلوم الۋ ٷشٸن ستۋدەنتتەر باسقا جوعارى وقۋ ورىندارىنا اۋىسا الادى. ول ٷشٸن بٸز جوو قىزمەتٸنٸڭ ٷلگٸلٸك قاعيداسىنا ٶزگەرٸس پەن تولىقتىرۋلار ەنگٸزدٸك», دەلٸنگەن حابارلامادا.
مينيسترلٸكتٸڭ مەلٸمەتٸنشە, تالاپكەرلەر بۇل وقۋ ورىندارىنا گرانتقا تٷسە المايدى, ال تٷلەكتەر ديپلوم المايدى. مۇنداي جاعدايدا ستۋدەنتتەر تەك باسقا ۋنيۆەرسيتەتتەرگە اۋىسۋ ارقىلى عانا تىعىرىقتان شىعا الادى.
«اتالعان جوعارى وقۋ ورىندارىنداعى بٸلٸم الۋشىلاردىڭ سانى وسى ۋاقىت ٸشٸندە ايتارلىقتاي تٶمەندەدٸ. ۇلتتىق بٸلٸم بەرۋ دەرەكتور قورىنىڭ اقپاراتىنا سەيكەس, ورتالىق ازييا ۋنيۆەرسيتەتٸندەگٸ بيىلعى وقۋ جىلىنداعى ستۋدەنتتەردٸڭ سانى 3 070-تەن 636-عا دەيٸن, «استانا» ۋنيۆەرسيتەتٸندە – 1 162-دەن 480-گە دەيٸن, اقتاۋ گۋمانيتارلىق-تەحنيكالىق ۋنيۆەرسيتەتٸندە – 1 207-دەن 398-گە دەيٸن ازايعان», - دەدٸ قر بعم بٸلٸم جەنە عىلىم سالاسىنداعى ساپانى قامتاماسىز ەتۋ كوميتەتٸنٸڭ تٶرايىمى گٷلزات كٶبەنوۆا.
كوميتەت تٷلەكتەر مەن جۇمىس بەرۋشٸلەرگە جوو-نىڭ ٶزٸندٸك ٷلگٸدەگٸ ديپلومداردىڭ سەريياسى, نٶمٸرٸ جەنە QR كودى بولاتىنىن نازار اۋدارۋىن سۇرادى.
«ديپلومدار سەريياسىن قر بعم بەكٸتەدٸ. ديپلوم نٶمٸرلەرٸن گەنەراتسييالاۋ ارنايى سەرۆيس ارقىلى جٷزەگە اسىرىلادى. ونىڭ كٶمەگٸمەن جوعارى وقۋ ورىندارى سەرييالاردى جەنە رەتتٸك نٶمٸرلەردٸ, سونداي-اق QR كودتى الادى. سونداي-اق تالاپكەرلەر مەن اتا-انالاردى جوو-نىڭ وقىتۋ ساپاسى, وقۋ ورنىنىڭ ينفراقۇرىلىمى مەن وقىتۋ تەسٸلدەرٸن زەردەلەي وتىرىپ, جوعارى وقۋ ورىندارىن تاڭداۋعا اسقان جاۋاپكەرشٸلٸكپەن قاراۋعا شاقىرامىز», دەلٸنگەن حابارلامادا.
سونىمەن بٸرگە ۆەدومستۆو باستاماسىمەن «اتامەكەن» ۇكپ ٶتكٸزەتٸن جوعارى وقۋ ورىندارىنىڭ رەسمي رەيتينگٸنە نازار اۋدارۋ قاجەت. رەيتينگ جۇمىس بەرۋشٸلەردٸڭ بٸلٸم بەرۋ باعدارلامالارىنىڭ مازمۇنى مەن قازاقستاندىق جوعارى وقۋ ورىندارى تٷلەكتەرٸنٸڭ سۇرانىسقا يە بولۋىن ەسكەرە وتىرىپ جاسالعان. رەيتينگٸنە بعم جەنە «اتامەكەن» ۇكپ سايتتارىنان قاراۋعا بولادى.
