Búgin elimizdiń barlyq óńirinde Ulttyq biryńǵai testileý bastalyp, aqpannyń 5-ine deiin jalǵasady. Respýblika boiynsha barlyǵy 143 testileý ótkizý pýnktinde 1 230 aýditoriia jumys isteidi, dep habarlaidy QR Bilim jáne ǵylym ministrliginiń baspasóz qyzmeti.
Qańtar aiyndaǵy UBT koronavirýstyń taralýyna jol bermeý jónindegi vedomstvoaralyq komissiianyń kelisimimen ótip, karantinge bailanysty túlekter testileýdi 15 lek boiynsha tapsyrady.
UBT-ny 120 myńnan astam adam tapsyrady dep josparlanyp otyr. Olar – 11 (12) synyp oqýshylary, ótken jyly UBT nátijeleri joiylǵan talapkerler jáne shyǵarmashylyq bilim berý baǵdarlamalary boiynsha basqasyna aýysqysy keletin stýdentter qatysady.
Testileý 5 pán boiynsha ótedi: 3 mindetti jáne tańdaǵan mamandyǵyna bailanysty 2 beiindi pán. UBT qatysýshylaryna barlyǵy 120 test tapsyrmasy beriledi, onyń ishinde Qazaqstan tarihy boiynsha 15 suraq, matematikalyq saýattylyq boiynsha 15 suraq, oqý saýattylyǵy boiynsha 20 suraq jáne beiindi pánder boiynsha 35 tapsyrmadan bolady. Testileý tapsyrýǵa 4 saǵat (240 minýt) beriledi. UBT-ǵa qatysýshylar barlyǵy 140 ball jinai alady.
Óńirlerde UBT ótkizý erejeleriniń saqtalýyn joǵary oqý oryndarynyń qyzmetkerleri men Ulttyq testileý ortalyǵynyń ókilderi baqylaityn bolady. Sondai-aq óńirlerdegi testileý barysyn Bilim berý salasyndaǵy sapany qamtamasyz etý departamentteriniń qyzmetkerleri qadaǵalaityn bolady. Testileý úrdisin arnaiy monitoringtik toptyń jáne «Adaldyq alańy» jobalyq keńsesiniń 403 ókili baqylaýda ustaidy.
Koronavirýstyq infektsiianyń taralý qaýpin azaitý maqsatynda UBT ótkizý kezinde sanitarlyq-epidemiologiialyq normalar men áleýmettik araqashyqtyq qatań saqtalatyn bolady. Testileý barysynda qatysýshylar arasynda keminde 2 metr qashyqtyq qamtamasyz etilip, aýditoriialardaǵy adamdardyń sany 50%-ǵa qysqartyldy. UBT bastalar aldynda aýditoriialar bakteritsidti shamdarmen zararsyzdandyrylatyn bolady. Sonymen qatar sanitarlyq normalarǵa sáikes ata-analar men muǵalimderge UBT ótkizý pýnktiniń aýmaǵynda bolýǵa tyiym salynady.
