Biyl Qazaqstan joldardyń jai-kúiin baǵalaýǵa arnalǵan eýropalyq baǵdarlama - EuroRAP-ty iske qospaq.
Bul sharany QR Indýstriia jáne infraqurylymdyq damý ministrligi Avtomobil joldary komiteti Dúniejúzilik Bankpen birlesip júzege asyrmaq, dep habarlaidy ministrliktiń baspasóz qyzmeti.
DDSU esebi boiynsha Qazaqstandaǵy jol-kólik apattarynan bolatyn ólim-jitim kórsetkishi 100 myń kólik quralyna shaqqanda 71,8 adamdy quraidy. Elimizde EuroRAP júiesin engizý avtomobil joldaryndaǵy qaýipsizdik deńgeiin kóterýge múmkindik berip, JKO sanynyń azaiýyna yqpal etpek.
Joldardyń jai-kúiin baǵalaýǵa arnalǵan eýropalyq baǵdarlamada joldardy egjei-tegjeili zertteý jáne málimetterdi jinaý úshin arnaiy qurylǵylarmen jabdyqtalǵan kóliktik quraldar, baǵdarlamalyq qamtamasyz etý qondyrǵylary men biliktilik kýrstarynan ótken mamandar jumys isteidi.
Baǵdarlamada jolda bolatyn 50-den astam túrli faktorǵa erekshe kóńil bólingen. Tekserý sharalarynyń nátijesinde alynǵan málimetter EuroRAP-tyń upaiyn baǵalaý jáne qaýipsiz joldarǵa quiylatyn investitsiialar josparyn nyǵaita túsedi.
Tutastai alǵanda, 2020 jyldan bastap jol qozǵalysy qaýipsizdigin kóterý baǵytynda biýdjetti egjei-tegjeili ázirleýmen qosa, respýblikalyq mańyzy bar avtomobil joldarynyń 5 myńnan astam jáne qalalardaǵy kóshelerdiń 1000 shaqyrymynda EuroRAP jol infraqurylymy qaýipsizdigin taldaý sharalary júrgiziledi dep josparlanýda.
Budan bólek, «EuroRAP-tyń ulttyq platformasynyń jetekshi bilimi» bazalyq qujattary ázirlenip, EuroRAP júiesin ulttyq zańnamaǵa engizý jónindegi egjei-tegjeili usynystar daiyndalady dep josparlanǵan.
Joldardyń jai-kúiin baǵalaýǵa arnalǵan eýropalyq baǵdarlamany engizýde Swedish National Road Consulting AB (SweRoad) shved kompaniiasy keńesshi bolmaq. Assotsiatsiiadaǵy sýbkonsýltant - QAZAQ Research Institute for Road Traffic Safety (Shvetsiia/Qazaqstan).
Aita keteiik, Qazaqstanda Jol qaýipsizdigin baǵalaýdyń halyqaralyq baǵdarlamasynyń – IRAP quraly «Ortalyq – Ońtústik» jáne «Batys Eýropa – Batys Qytai» dálizderin jobalaý kezeńinde qoldanylǵan bolatyn. Osylaisha, 2017 jyly uzyndyǵy 297 shaqyrymdy quraityn «Balqash – Býrylbaital» jol ýchaskesin, «Almaty – RF shekarasy (Ekaterinbýrgqa)» jolyn rekonstrýktsiialaý jobalary IRAP baǵalaýynan ótti.
