QR Premer-Ministri Asqar Maminniń tóraǵalyǵymen ótken Úkimet otyrysynda eńbek jáne halyqty áleýmettik qorǵaý ministri Birjan Nurymbetov azamattardy jumyspen qamtamasyz etý boiynsha qabyldanyp jatqan sharalar týraly aityp berdi, dep habarlaidy "Ult aqparat" primeminister.kz saityna silteme jasap.
Ministr atap ótkendei, syrtqy naryqtardaǵy jaǵdai Qazaqstandaǵy eńbek naryǵyna belgili bir syn-tegeýrinderdi týdyrýy múmkin. Onyń ishinde jumyskerlerdiń bosatylý múmkindigi, jańa qurylatyn jumys oryndary sanynyń azaiýy, jumyssyzdyq deńgeiiniń ósýi bar.
«Elimizde osyndai keri áserlerdi boldyrmaý maqsatynda jańa jumys oryndaryn qurýǵa baǵyttalǵan daǵdarysqa qarsy jańa sharalardy qamtityn Jol kartasy ázirlenip jatyr», — dedi B. Nurymbetov.
Jol kartasynda 2009-2010 jyldary oń nátijesin bergen, jumyssyzdar sanynyń óspeýine áser etken áleýmettik infraqurylymdyq jobalardy iske asyrý sharalary kózdeledi.
Sonymen, áleýmettik infraqurylym obektilerin, respýblikalyq jáne kommýnaldyq menshiktegi TKSh nysandaryn, injenerlik-kólik infraqurylymyn kúrdeli, aǵymdaǵy jóndeý jáne qaita jańartý, sondai-aq eldi mekenderdi abattandyrý usynylady. Jańǵyrtý qajettiligi men infraqurylymdyq jobalar tizbesi «Atameken» QR UKP ótkizgen óńirlerdiń problemalyq máseleleriniń skrining nátijelerin eskere otyryp anyqtalatyn bolady.
B. Nurymbetov infraqurylymdyq jobalardy júzege asyrý sharttaryn atady:
-
rekonstrýktsiialaý, kúrdeli, aǵymdaǵy jóndeý jáne abattandyrý jumystary kezinde jumysshylardyń keminde 50%-y halyqty jumyspen qamtý ortalyqtarynyń joldamalary arqyly tartylady;
-
otandyq taýar óndirýshilerdi qoldaý maqsatynda jobalardy iske asyrý kezinde taýar men kórsetiletin qyzmettiń úlesi keminde 90% bolýy tiis.
Budan ózge, irikteý kezinde kóp jumys kúshin talap etetin, jumyspen qamtylýynyń uzaqtyǵyn qamtityn jobalarǵa basymdyq beriledi jáne jumyspen qamtý ortalyqtary arqyly tartylǵan jumysshylardyń jalaqysy 85 myń teńgeden tómen emes mólsherde belgileý sharty qoiylady.
Jol kartasyn iske asyrýǵa bólinetin qarajattyń jalpy limitin jumys kúshiniń sanyna bailanysty óńirler arasynda bólý usynylady.
Jergilikti ákimdikter tiisti salalyq ortalyq memlekettik organdardyń kelisimi boiynsha infraqurylymdyq jobalardy irikteitin bolady. Infraqurylymdyq nysandardyń tizbesi QR Úkimetiniń qaraýyna shyǵarylady.
Eńbek jáne halyqty áleýmettik qorǵaý ministrligi «Jumys oryndaryn qurýdyń integratsiialanǵan kartasy» AAJ arqyly jumys oryndaryn qurýǵa jáne jumysqa ornalastyrý faktilerine monitoring júrgizetin bolady.
«Jalpy, Jol kartasy men basqa da sharalardy júzege asyrýdyń arqasynda qosymsha 200 myńǵa jýyq jańa jumys orny qurylatyn bolady», — dep habarlady ministr.
Budan ózge, «Eńbek» memlekettik baǵdarlamasynyń áleýeti tolyq paidalanylatyn bolady. Biyl 735 myń adamdy jumyspen qamtý josparlanýda. Baǵdarlamany iske asyrýǵa respýblikalyq jáne jergilikti biýdjetterden osy jylǵa 123 mlrd teńge qarastyrylǵan.
B. Nurymbetovtyń aitýynsha, halyqtyń áleýmettik osal toptary úshin mikrokreditter men granttar berýdiń sharttary men tártibi jeńildetildi. Qosymsha qarajat bólingen jaǵdaida «Eńbek» baǵdarlamasy boiynsha jumyspen qamtý sharalarymen taǵy 46 myńǵa jýyq azamat qamtylatyn bolady.
Qyzmetkerlerdiń eńbek quqyqtaryn qorǵaý jáne jumyspen qamtylý deńgeiin saqtaý maqsatynda qyzmetkerlerdi jumysqa ornalastyrý jónindegi sharalardy qosa alǵanda, jumystan shyǵarýdy josparlap jatqan kásiporyndardyń kúndelikti monitoringi kúsheitiletin bolady.
Kásiporyndarmen jáne ekonomika salalarymen jumys oryndaryn saqtaý týraly memorandýmdar jasasý, jumysshylar aǵyny boiynsha jol kartalaryn jasaý boiynsha jumys jalǵastyrylady.
Táýekel aimaǵynda ornalasqan barlyq kásiporyndar birinshi kezekte eńbekaqy boiynsha bereshekke jol bermeý maqsatynda profilaktikalyq baqylaýmen qamtamasyz etiletin bolady.
Qorytyndylai kele, B. Nurymbetov atalǵan sharalardy júzege asyrý úshin qyzmetkerlerdiń eńbek quqyqtarynyń buzylýyna jedel áreket etý jónindegi is-sharalar josparynyń tiisti jobasy ázirlengenin atap ótti.
