Turǵyn sany 200 adamnan aspaityn aýyldarǵa sý tazartý júiesi ornatylady, dep habarlaidy "Ult aqparat".
Bul týraly Indýstriia jáne infraqurylymdyq damý ministri Beibit Atamqulov halyq aldyndaǵy esebinde aitty.
«Búgingi kúni respýblika halqynyń 94,1 paiyzy, iaǵni 17,7 mln adam sýmen qamtamasyz etilgen. Onyń ishinde 10,7 mln qala halqy jáne 7 mln aýyl halqy bar. Qazaqstanda 6316 aýyl bar bolsa, sonyń ishinde 4394 aýylda aýyzsý máselesi sheshilgen. Sýmen jabdyqtaýǵa qoly jetpei otyrǵan 1922 aýyldyń 793-inde ortalyqtandyrylǵan sý qubyryn salý josparlanǵan. Al qalǵan 1129 aýylda turǵyndar sany 200 adamnan aspaidy. Mundai eldi mekenderde jergilikti sý tazartý júiesi ornatylady», - dedi vedomstvo basshysy.
Ministr biyl sýmen jabdyqtaý jáne sý burý júielerin damytý jobalaryna respýblikalyq biýdjetten 151,4 mlrd teńge bólingenin eske saldy.
«Jyl aiaǵynda qala halqynyń 98%-y jáne aýyl halqynyń 91,8%-y sýdan tapshylyq kórmeitin bolady. 2025 jylǵa deiin halyqty aýyzsýmen 100% qamtamasyz etý josparlanǵan», - dedi Beibit Atamqulov.
