Elordada úkimettik emes uiymdardyń ókilderi «Táýelsizdiktiń 30 jyldyǵy ótkizýdegi azamattyq sektordyń róli» taqyrybynda kezdesý ótkizdi, dep habarlaidy QazAqparat.
«Shyn máninde memlekettiń Táýelsizdigi men azamattyq qoǵamnyń damýy – bul ózara tyǵyz bailanysty ári bir-birine táýeldi uǵymdar. Óitkeni, Táýelsizdikke ákeletin eldiń jańkeshti kúresi bolsa, sol Táýelsizdikti qolda ustap turatyn eń aldymen belsendi, otanshyl azamattardyń úlesi», - dedi kezdesýdi ashqan QR Aqparat jáne qoǵamdyq damý vitse-ministri Bolat Tilepov.
Onyń dereginshe, Táýelsizdiktiń eleń-alańynda elimizde birneshe ondaǵan ǵana ÚEU bolsa, búginde tirkelgen mundai qoǵamdyq uiymdardyń sany 22 myńnan asyp jyǵylady. Al solardyń 16 myńy belsendi jumys isteidi. Azamattyq sektorda shamamen 24 myń adam jumyspen qamtylǵan. Olardyń 9 paiyzy jastar saiasaty jáne balalar bastamasy salasynda, 34 paiyzy halyqtyń az qamtylǵan tobyn qoldaý, bilim men ǵylym, sport pen dene tárbiesi salalarynda, 16 paiyzy salaýatty ómir saltyn nasihattaý, azamattar men uiymdardyń zańdy múddeleri men quqyqtaryn qorǵaý, 9 paiyzy genderlik problemalardy sheshý, qorshaǵan ortany qorǵaý, mádeniet pen ónderdi damytý salalarynda jumys isteidi.
«Úkimettik emes uiymdardyń sandyq qurylymy azamattarymyzdy barynsha tolǵandyratyn problemalardy pash etedi. Osy turǵydan alǵanda úkimettik emes sektordy pikirlester qaýymdastyǵy retinde qarastyramyz. Olardyń kúsh-qýaty men qabileti elimizdegi oń ózgeristerdiń qozǵaýshysy sanalady. Bul osy mereilyq jylda airyqsha mánge ie», - dedi Bolat Tilepov.
