Elimizde 16 myń dáriger koronavirýspen kúresýde. Bul týraly QR Densaýlyq saqtaý ministri Eljan Birtanov Zakon.kz basylymynyń Instagram paraqshasyndaǵy tikelei efirinde aitty, dep habarlaidy QazAqparat.
«Biz ýaqytyly daiyndalǵandyqtan, mamandar jetkilikti. Búgingi kúni infektsiialyq aýrýhanalar, provizorlyq statsionarlar, karantindik nysandarǵa 16 myń dáriger tartyldy. Dárigerler, medbikeler, kishi meditsinalyq personal, sanitar-dárigerler, týberkýlez ortalyqtarynyń qyzmetkerleri eńbek etýde. Karantinge bailanysty belgili bir josparly kómekter, stomatologiialyq qyzmetter azaidy. Óz erkimen kómek kórsetkisi keletin dárigerler sany kóbeidi. Barlyq oblystyq densaýlyq saqtaý basqarmalarynan kadrlar jinalýda», - deidi Eljan Birtanov.
Ministrdiń sózine sensek, koronavirýspen kúreske stýdent-dárigerler, joǵary kýrsta oqityn stýdentter de tartylyp otyr.
«Olardy jumys isteýge daiyndap jatyrmyz. Jalpy praktikadaǵy dárigerdi koronavirýsty emdeitin mamanǵa ainaldyrý qiyn emes. Árine, olar tolyqqandy infektsionist bolyp ketpeidi. Osyndai jaǵdaida eń bastysy - kómek kórsete alýy. Boiyn úrei bilegender de, jumystan bas tartqan dárigerler de bar. Mundai jaǵdai oryn almaýy múmkin emes ekenin bilemiz. Bul baǵyt boiynsha da jumys istep jatyrmyz. Sharalar qabyldanyp, materialdyq jáne moraldyq kómek kórsetilýde. Prezident aqsha bólip, syiaqy men áleýmettik kepildik uiymdastyrǵany óte mańyzdy. Bul bizge dárigerlerdi qoldaýǵa kómektesedi», - deidi ol.
