Qazaqstanda 14 shahar qala mártebesinen aiyrylady. Bul jaiynda QR Premer-Ministri Asqar Maminniń Májilis depýtatynyń saýalyna bergen jaýabynda aitylǵan, dep habarlaidy "Ult aqparat".
«Keibir aýdandyq mańyzy bar qalalardyń halyq sany, ekonomika qurylymy jáne ómir súrý jaǵdailary aýyldyq eldi mekenderden esh aiyrmashylyǵy joq bolǵandyqtan olardyń mártebesin ózgertý máselesi týyndap otyr. Halyq sany boiynsha óz mártebesine sai kelmeitin elimizde mundai 14 qala (Aqmola oblysynda – 3 qala, ShQO-da – 2, Qaraǵandy oblysynda – 2, Qyzylorda oblysynda – 1, Mańǵystaý oblysynda - 1, SQO-da - 2) bar», - dedi Úkimet basshysy.
Onyń atap ótýinshe, qazirgi ýaqytta Memleket basshysynyń 2019 jyldyń 2 qyrkúiegindegi «Syndarly qoǵamdyq dialog – Qazaqstannyń turaqtylyǵy men órkendeýiniń negizi» atty Joldaýyn júzege asyrý boiynsha jalpyulttyq jospardyń 74-tarmaǵyna jáne 2020 jylǵa arnalǵan Úkimettiń zań jobalaý jumysy josparyna sáikes, Ulttyq ekonomika ministrligi «Aýdandyq, qalalyq jáne aýdandyq deńgeidegi biliktiń derbestigi men jaýapkershiligin keńeitý máseleleri boiynsha Qazaqstan Respýblikasynyń keibir zańnamalyq aktilerine ózgertýler men tolyqtyrýlar engizý týraly» zań jobasyn ázirlep jatyr. Zań jobasy Parlamentke 2020 jyldyń qyrkúieginde engiziledi.
