Qazaqstanda 2019 jyly 139,5 myń neke tirkelip, 59,8 myń jup ajyrasty, dep habarlaidy "Ult aqparat" QR Ulttyq ekonomika ministrliginiń Statistika komitetine silteme jasap.
Málimetke súiensek, byltyr qiylǵan nekelerdiń sany 1,2% kóp bolyp, 139,5 myńdy qurady. Onyń ishinde 98,2 myń nemese 70,4 paiyz neke qalalarda, 41,3 myńy nemese 29,6 paiyzy aýyldyq jerlerde tirkelgen. 84,2 paiyzy - monoetnikalyq, 15,8 paiyzy etnosaralyq nekeler boldy. Birinshi ret otbasyn qurǵan erler – 81,8 paiyz, áielder – 83,6 paiyz.
Qarym-qatynasyn zańdastyrǵandardyń eń kóp sany Nur-Sultan qalasynda tirkeldi. Eń azy – Soltústik Qazaqstan oblysynda.
2019 jyly otbasyn qurýdy sheshkenderdiń ortasha jasy: erlerde - 27,6 jas, áielderde 25 jas boldy.
Áielderdiń 42,9 paiyzy 20-24 jasynda turmys qurǵan eken. Erlerdiń 35,6 paiyzy 25-29 jasynda úilendi.
Ótken jyly Qazaqstanda ajyrasýlar sany 9,1% artyp, 59,8 myńdy quraǵan.
Nekeni buzý aýyldyq jerlerde az bolatyny anyqtalyp otyr. 26,3 paiyzy nemese 15,7 myń jup aýyldarda ajyrasqan. Qaladaǵy kórsetkish – 73,7 paiyz nemese 44,1 myńdy qurady.
Zańdy qarym-qatynasty úzgenderdiń eń kóp sany Pavlodar oblysynda tirkeldi, eń azy – Túrkistan oblysynda.
Birinshi nekeni buzǵan jubailardyń ortasha jasy: erlerde 37,9 jas, áielderde 34,8 jas.
Ortaq balalary joq erli-zaiyptylar arasynda ajyrasý jii bolady – 40,3 paiyz. Bir ortaq balasy barlar – 30 paiyz, eki jáne odan da kóp balalary barlar – 29,7 paiyz.
Byltyr nekeni eń kóp buzý 5-9 jyl otaýlasqandar arasynda tirkelgen – 27,7 paiyz. Ajyrasýlardyń 21,7 paiyz – bir shańyraq astynda 2-4 jyl turǵandar, 16,6 paiyzy – 10-14 jyl, 13,7 paiyzy – 20 jyl jáne odan joǵary, 8,2 paiyzy – 15-19 jyl, 7,5 paiyzy – 1 jyl, 4,6 paiyzy – otaýlasqanyna 1 jyl tolmaǵan juptar arasynda boldy.
