Qazaqstanda jeke tulǵalardyń ulttyq valiýtadaǵy jinaq jáne jedel salymdary syiaqysynyń shekti mólsherlemesi bekitildi. Bul týraly retteýshi banktiń baspasóz qyzmeti málimdedi.
«Biyl 1 qazannan bastap jeke tulǵalardyń ulttyq valiýtada saqtaǵan depozitteriniń sharttaryna ózgeris engizildi. Endi jeke tulǵalardyń salymy jedel jáne jedel emes jinaq bolyp bólinedi» , - delingen Ulttyq banktiń habarlamasynda.
Syiaqy mólsherlemesi salym túri men merzimine qarai saralanatyn bolady. Sondai-aq shuǵyl qaitaryp alý nemese toltyrý quqyǵyna qarai qarastyrylady.
Osyǵan orai Qazaqstannyń depozitterge kepildik berý qory (KDIF) shekti mólsherlemeni bekitti.
KDIF óz quziretindegi bankter májbúrli jaǵdaida jumysyn toqtata qalsa, ondaǵy saqtalǵan jeke tulǵalardyń qarjysyn (depozitegi, esepshottaǵy sondai-aq tólem kartasyndaǵy) qaitarýǵa kepildik beredi. Qazirgi tańda depozitterdi kepildendirý júiesine 27 bank qatysady. KDIF kepildigi barlyq jeke kásipkerler men jeke tulǵalarǵa jaraidy.
Jinaqty shetel valiýtasymen júrgizetinder úshin burynǵy ádis qala bermek. Iaǵni syiaqy mólsherlemesi salym merzimine qaramastan 1 paiyzdyq deńgeiin saqtap turady.
«Salymdardy jikteý men syiaqynyń shekti mólsherin bekitý 1 qazannan keiingi depozitterge qatysty. Oǵan deiingileri burynǵy kelisimshartta kórsetilgendei jalǵasa beredi», - dedi Ulttyq bank baspasóz qyzmeti.
