M.V. Lomonosov atyndaǵy Máskeý memlekettik ýniversitetiniń qazaqstandyq filialyna jeke ǵimarat berý kerek. Bul týraly Parlament Senatynyń jalpy otyrysynda depýtat Baqytjan Jumaǵulov aitty, dep habarlaidy QazAqparat tilshisi.
Qazaqstandyq filialdyń qyzmetin odan ary zańnamalyq turǵyda bekitý maqsatynda 2017 jylǵy 9 qarashada Cheliabinsk qalasynda QR Úkimeti men RF Úkimeti arasynda M.V. Lomonosov atyndaǵy Máskeý memlekettik ýniversitetiniń qazaqstandyq filialynyń qyzmeti týraly kelisimge qol qoiyldy.
«Osy kelisimdi ratifikatsiialaý - filial jumysynyń quqyqtyq jaǵdailaryn jaqsartýǵa jáne retteýge múmkindik beredi. Sonymen qatar, qaralyp otyrǵan zań jobasyn jumys toby men Senat komitetinde talqylaý barysynda týyndaǵan birqatar máselelerdi atap ótkim keledi. Osy oraida oqytý granttaryna toqtalatyn bolsaq, Máskeý memlekettik ýniversitetiniń filialynda 1 mln 690 myń teńgeni qurady. Mundai soma bilikti professorlardy tartýǵa, dáristerdi joǵary deńgeide ótkizýge múmkindik beredi. Bul shyn máninde bilim berý sapasynyń kepili. Al bizdiń joǵary oqý oryndarynda, tipti ulttyq ýniversitetterde granttar somasy áldeqaida tómen», - dedi depýtat.
Onyń sózine qaraǵanda, búginde eldiń básekege qabilettilik sharttarynyń biri retinde bilim berý sapasy birinshi orynǵa shyqty. Bul oraida bilim sapasyn kóterýge baǵyttalǵan keshendi is-sharalar júrgizý týraly oilaný qajettigi bar. Osy rette Qazaqstannyń joǵary oqý oryndarynda granttardyń qunyn arttyrý óte mańyzdy.
«Filial qurylǵan ýaqyttan beri L.N. Gýmilev atyndaǵy Eýraziia ulttyq ýniversitetiniń bazasynda jumys istep keledi. Ǵimaratqa qatysty 14 jylda 270 mln teńgeden astam qarjy EUÝ tarapynan jumsaldy. Bul durys emes degen de pikirler aityldy. Sebebi Máskeý memlekettik ýniversiteti jáne Eýraziia ulttyq ýniversiteti álemdik arenada, sondai-aq dúniejúzilik reitingterde básekelester bolyp sanalady. Sondyqtan MMÝ-diń Qazaqstandaǵy filialyna jeke ǵimarat bólip berýdi tiimdi sheshim dep oilaimyz», - dedi B. Jumaǵulov.
Óz kezeginde QR Bilim jáne ǵylym ministri Kúlásh Shámshidinova aitylǵan usynystarmen kelise otyryp: «Bizdiń JOO-larda granttar deńgeiin kóterý usynysy osyǵan deiin birneshe márte aityldy. Biz osy qadamnyń qajet ekenin túsinip otyrmyz. Al MMÝ-diń filialyna jeke ǵimarat bólý máselesi qaralyp jatyr», - dedi.
Aita keteiik, 2000 jyly QR Tuńǵysh Prezidenti Nursultan Nazarbaev M.V. Lomonosov atyndaǵy Máskeý memlekettik ýniversitetiniń Qazaqstandaǵy filialyn ashý jóninde bastama kóterdi. Sol jyly 9 qazanda RF Prezidenti V. Pýtinniń Qazaqstanǵa sapary kezinde filialdyń qurylýy týraly hattamaǵa qol qoiyldy. Bilim ordasy osy ýaqytqa deiin L.N. Gýmilev Eýraziia ulttyq ýniversitetiniń bazasynda qyzmet etýde.
Budan buryn habarlanǵandai, jalpy otyrysta palata depýtattary «QR Úkimeti men RF Úkimeti arasyndaǵy M.V. Lomonosov atyndaǵy Máskeý memlekettik ýniversitetiniń Qazaqstandyq filialynyń jumys isteýi týraly kelisimdi ratifikatsiialaý týraly» Zańyn qabyldady.
