Elordada Halyqaralyq sybailas jemqorlyqqa qarsy akademiianyń segizinshi assambleiasy ashyldy, dep habarlaidy QazAqparat.
Halyqaralyq sybailas jemqorlyqqa qarsy akademiia (HSQA) men Qazaqstan Respýblikasy búgin álemniń túkpir-túkpirinen Nur-Sultanǵa kelgen 70-ten astam delegatty kútip aldy. 46-dan astam ulttyq jáne institýtsionaldyq uiymdardyń ókilderi jalpy maqsattar men HSQA strategiiasyn talqylaý úshin úshkúndik is-sharaǵa qatysady.
Kún tártibinde akademiia úshin qarajat jinaý, onyń aǵymdaǵy jumys baǵdarlamasyn iske asyrý jáne akademiianyń jańa strategiiasyn ázirleý máseleleri qaralady. Sonymen qatar, HSQA-nyń sybailas jemqorlyqqa qarsy keibir baǵdarlamalary talqylanatyn paneldik pikirtalas ótedi.
Sessiiany Grýziianyń Qazaqstandaǵy Elshisi Zýrab Abashidze ashty. Ol Assambleia tóraǵasy qyzmetinen ketip bara jatqan Gocha Lordkipanidzeniń atynan sóz sóiledi.
«Halyqaralyq sybailas jemqorlyqqa qarsy akademiiaǵa qyzmet etýge jáne sybailas jemqorlyqqa qarsy is-qimyl boiynsha jalpy iske óz úlesimdi qosqanyma qýanamyn. Men bul sessiia uiymdastyrý men onyń mańyzdy missiiasyn odan ári nyǵaita túsedi degen úmittenemin», – delingen Lordkipanidzeniń sózinde.
Assambleia qatysýshylaryn Qazaqstan Respýblikasynyń Memlekettik hatshysy Qyrymbek Kósherbaev QR Prezidenti atynan quttyqtady. Óziniń quttyqtaý sózinde Prezident Qazaqstannyń júieli túrde moiyndalǵan halyqaralyq standarttardyń negizinde sybailas jemqorlyqpen ymyrasyz kúres júrgizip kele jatqanyn aityp ótken.
«2008 jyly bizdiń elimiz BUU-nyń Sybailas jemqorlyqqa qarsy konventsiiasyn ratifikatsiialady. Sybailas jemqorlyqqa qarsy kúres jónindegi Ystanbul is-qimyl josparynyń usynymdaryn oryndaý bóliginde eleýli progreske qol jetkizildi. Osy jyldyń 27 tamyzynda Qazaqstannyń Eýropa Keńesiniń jemqorlyqqa qarsy memleketter tobyna qosylýyn maquldaý týraly Qazaqstan Prezidentiniń Jarlyǵyna qol qoiyldy. Osylaisha biz álemdik qoǵamdastyqqa elimizdiń eń joǵary Halyqaralyq sybailas jemqorlyqqa qarsy standarttarǵa adaldyǵyn taǵy da pash etemiz», - delingen quttyqtaý hatta.
Qabyldaýshy eldiń atynan sóilegen sózinde QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev elimizdiń jemqorlyqqa qarsy bastamalarynda qol jetkizgen jetistigin atap ótti.
«Qazirgi ýaqytta Qazaqstanda sybailas jemqorlyq deńgeiin túbegeili azaitýǵa baǵyttalǵan reformalardyń jańa paketin daiyndaý boiynsha júieli jumys júrgizilýde», – dep atap ótti Sybailas jemqorlyqqa qarsy vedomstvo basshysy.
Qazaqstan úshin birinshi kezektegi basymdyqtardyń biri - turmystyq sybailas jemqorlyqty joiý. Bul maqsatta birinshi kezekte, memlekettik qyzmetterdi barynsha tsifrlandyrý kózdelgen. Búgingi tańda Qazaqstan BUU-nyń tiisti reitingisinde elektrondyq úkimettiń damý deńgeii óte joǵary elder tobyna kiredi.
Assambleia sessiiasy 4 qazanda aiaqtalady.
