Qazaqstannyń kommýnistik halyq partiiasy Nur-Sultan qalalyq filialynyń ekinshi hatshysy Dildá Maidanbekova jastar trendin zertteý aiasyndaǵy saýalnama nátijesin jariia etti, dep habarlaidy QazAqparat.
«Eger demografiialyq kórsetkishterge qaraityn bolsaq, halyq sany artyp keledi. Búginde bizde 18,6 mln-nan astam adam bar. Halyq sany tabiǵi ósim esebinen artýda. Degenmen elden jastardyń ketýiniń arta túsýi alańdatarlyq jait bolyp otyr. Jastar trendtin zertteý aiasyndaǵy saýalnama málimetterine sáikes, olardyń kópshiligi Qazaqstannan ketýdi josparlaýda. Naqtyraq aitar bolsaq, 15 pen 29 jas aralyǵyndaǵy qazaqstandyqtardyń shamamen 42 paiyzy shetelge oqýǵa nemese turaqty turýǵa ketýdi josparlap júr», - dedi ol «Aqyldy jastardyń shetelge ketýi. Sebepteri jáne oǵan qalai qarsy turýǵa bolady?» taqyrybyndaǵy dóńgelek ústel barysynda.
Onyń málimetinshe, shetelde turyp bilim alyp jatqan jastardyń jartysyna jýyǵy sol jaqta qalyp qoiady. Al shamamen 40 paiyzy qyzyqty jumys usynǵan jaǵdaida Qazaqstanǵa oralýy múmkin.
«Qazaqstanda ómir súretin orta jastaǵylar ortaǵa jaqsy beiimdelgen. Al memlekettik qyzmette, iri bizneste ózine oryn joq dep sanaityn jastar ózge elderge nazar salyp otyr. Kóshi-qon kóńil-kúiin aiqyndaityn negizgi faktorlar mynalar: óziniń materialdyq ál-aýqatyn jaqsartý, keleshektiń, mansap jolynda joǵarylaý men damýdyń joqtyǵy, sheteldegi bilim berý qyzmetteriniń joǵary sapasy», -dedi Dildá Maidanbekova.
Onyń atap ótýinshe, Qazaqstandaǵy orta jáne joǵary bilim sapasyndaǵy problema qarjylandyrý deńgeiimen tikelei bailanysty bolyp otyr.
«Máselen, 2016 jyly joǵary bilim berýge arnalǵan memlekettik biýdjettik shyǵystary kúndizgi bólimde oqityn bir stýdentke 504 dollardy qurady. Salystyrmaly túrde aitar bolsaq, bul kórsetkish Reseide 8,8 myń, Qytaida 3 245, Túrkiiada 3 590, Ońtústik Koreiada 9 656, AQSh-ta 11 319 dollardy quraidy», - dedi ol.
