Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine Kaspii teńizinde qyzmetti júzege asyrýǵa bailanysty máseleler boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasynyń negizgi maqsaty - Kaspii teńiziniń quqyqtyq mártebesi týraly konventsiianyń erejelerin Qazaqstan Respýblikasynyń birqatar zańnamalyq aktilerine engizý.
«2018 jylǵy 12 tamyzda besinshi Kaspii sammiti barysynda qol qoiylǵan Kaspii teńiziniń quqyqtyq mártebesi týraly konventsiiany Qazaqstan 2019 jylǵy 8 aqpanda ratifikatsiialady. Konventsiia quqyqtyq retteýdi qajet etetin árbir másele boiynsha tabandy ári qaǵidatty pikir-talastarmen qosa, 20 jyldan astam ýaqyt alǵan uzaq jáne kúrdeli kelissózder úderisiniń nátijesi boldy. Kaspii jaǵalaýy memleketteri akvatoriiany ártúrli rejimge, aýmaqtarǵa, ishki sýlarǵa, eni 15 teńiz mili bolatyn aýmaqtyq sýlarǵa, 10 mildik balyq aýlaý jáne ortaq teńiz keńistigine bólý týraly konsensýsqa qol jetkizdi», - dedi QR Syrtqy ister ministri Muhtar Tileýberdi.
Onyń aitýynsha, Qazaqstan zańnamasyn konventsiianyń erejelerine sáikestenderý maqsatynda atalǵan zań jobasy ázirlendi.
Zań jobasynda «balyq aýlaý aimaǵy», «balyq aýlaý aimaǵynyń rejimi» degen uǵymdar engizilip otyr, sondai-aq balyq aýlaý aimaǵynda sý biologiialyq resýrstaryna kásipshilik júrgizýge Qazaqstan Respýblikasynyń airyqsha quqyqtarynyń saqtalýyn baqylaý jónindegi memlekettik organdardyń quzyreti jáne olardyń ózara is-qimyl jasaý tártibi bekitiledi.
Konventsiianyń erejelerin eskere otyryp, qoldanystaǵy «aýmaqtyq sýlar eniniń esebi úshin bastapqy syzyq», «aýmaqtyq sýlar», «Qazaqstan Respýblikasynyń shekaralyq keńistigi» degen uǵymdarǵa ózgerister engizilýde.
