Qazaqstannyń kópdeńgeili zeinetaqy júiesi halyqaralyq standarttarǵa sai keledi. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
EYDU halyqaralyq institýttary men Dúniejúzilik bank paiymynsha, turǵyndar qartaiýynyń jahandyq protsesi jáne olardyń jumysqa qabiletti bóligine júktemeniń artýy jaǵdaiynda zeinet jasyndaǵy halyqtyń bazalyq qajettiligin qamtamasyz etýdegi jumysshynyń, jumys berýshiniń jaýapkershiligi jáne memlekettik mindettemesi bar kópdeńgeili zeinetaqy júiesiniń barynsha tiimdi jáne turaqty ekendigi moiyndalady. Aitalyq, Melbourne Mercer Global Pension Index (MMGPI) jahandyq zeinetaqy indeksine sáikes, 2019 jyly álemniń aldyńǵy qatarlyq zeinetaqy júiesiniń úzdik 30 eline jinaqtaýshy zeinetaqy júiesi bar Daniia, Avstraliia, Chili, Singapýr memleketteri kirdi», - dedi Úkimet basshysy.
Onyń atap ótýinshe, qazirgi ýaqytta Qazaqstannyń kópdeńgeili zeinetaqy júiesi halyqaralyq standarttarǵa sai keledi.
«Yntymaqty zeinetaqy júiesine tolyqtai qaita oralý birqatar problema týyndatatyndyǵyn atap ótken jón. Birinshiden, memlekettik biýdjetke júkteme aitarlyqtai artady. Ulttyq bank aqparatyna sáikes, yntymaqty zeinetaqy júiesine oralǵan jaǵdaida 2021 jyldan bastap zeinetaqy tóleýge arnalǵan biýdjet shyǵystary 3,2 esege ulǵaiady. Bul rette jalpy ishki ónimnen paiyzǵa shaqqandaǵy shyǵystar 3,3 paiyzdan 11 paiyzǵa deiin artady. Uzaqmerzimdi keleshekte, 2050 jylǵa qarai zeinetaqy tóleýge arnalǵan memlekettik biýdjet shyǵystary zeinetaqy júiesiniń qolddanystaǵy parametrleri kezindegi shyǵystarmen salystyrǵanda 10 esege kóbeiedi», - dedi Asqar Mamin.
Úkimet basshysynyń dereginshe, yntymaqty júiege tolyq kóshken jaǵdaida jalaqydan ustalatyn 10 paiyz mólsherindegi jarnalardyń jyldyq kólemi 2021 jyly zeinetaqy tólemderiniń 1/8 ǵana, al 2050 jyly 1/12 bóligin ǵana jabady.
«Ekinshiden, Qazaqstanda ómir súrý uzaqtyǵynyń uzarýy jaǵdaiynda keleshekte, 2050 jylǵa deiin áleýetti qoldaý koeffitsienti aitarlyqtai tómendeidi. Mundai jaǵdaida zeinetaqymen qamtamasyz etýdiń qarjy kózi ne salyqtardy, ne mindetti zeinetaqy jarnasy (jumysshynyń nemese jumys berýshiniń esebinen) mólsherin kóterý qajet bolady», - dedi Premer-Ministr.
