El Prezidenti Qasym-Jomart Toqaev Nur Otan partiiasynyń kezekten tys XXI sezinde Qazaqstannyń álemdik qaýymdastyqtaǵy orny týraly pikir bildirdi, dep habarlaidy QazAqparat.
«Tutastai alǵanda, Qazaqstan naryqtyq ekonomikaǵa ainalyp, óziniń beibitsúigishtigi men halyqaralyq mindettemelerdi berik ustanatynyn málimdep, álemdik qaýymdastyqtaǵy bedeldi, qurmetti elge ainaldy. Álemdik qaýymdastyqta ol iadroǵa qarsy jahandyq qozǵalystyń kóshbasshysy dep atalady. Sondai-aq, Táýelsizdik jyldarynda Qazaqstan barlyq ekonomikalyq kórsetkishter boiynsha Ortalyq Aziia óńirinde aldyńǵy qatarǵa shyqqanyn umytpaý kerek», - dedi Qasym-Jomart Toqaev.
Aita keteiik, Nur-Sultanda «Nur Otan» partiiasynyń kezekten tys XXI sezi jabyq rejimde ótip jatyr. Bekitilgen kún tártibine sáikes, onda partiia Tóraǵasyn sailaý týraly, jarǵyǵa ózgerister men tolyqtyrýlar engizý týraly jáne saiasi keńes quramyna ózgerister engizý týraly - úsh másele qaralady.
