Búgin QR Syrtqy ister ministrliginde iadrolyq qarýdan azat aimaqtar arasyndaǵy yntymaqtastyqty nyǵaitýǵa arnalǵan seminar jumysyn bastady, dep habarlaidy QazAqparat tilshisi.
«Birikken Ulttar Uiymynyń Qarýsyzdaný másmeleleri jónindegi basqarmasyna erekshe rizashylyǵymdy bildirgim keledi. Basqarmanyń belsendi qoldaýy men yntymaqtastyǵynyń arqasynda iadrolyq qarýdan azat aimaqtar arasyndaǵy qatynastardy damytý men konsýltatsiialyq mehanizmderdi qalyptastyrýǵa baǵyttalǵan birlesken jobamyz búgin iske asyp otyr. Árine, 29 tamyz - Qazaqstan úshin, Qazaqstan halqy úshin erkshe kún. Osydan 28 jyl buryn Qazaqstannyń Tuńǵysh Prezidenti – Elbasy Nursultan Nazarbaevtyń tarihi sheshimimen Semei synaq alańy jabylǵan bolatyn. Sondyqtan bul seminardyń da úlken praktikalyq, saiasi mańyzy bar», - dedi seminar jumysyn ashqan QR Syrtqy ister ministriniń orynbasary Erjan Ashyqbaev.
Sonymen qatar, ol Qazaqstannyń jahandyq antiiadrolyq qozǵalys kóshbasshylarynyń biri retinde iadrolyq qaýdan azat álem qurý maqsatynda iadrolyq qarýdan azat aimaqtardy nyǵaitýdy jáne olardyń geografiiasyn keńeitýdi qoldap kele jatqanyn aitty.
«Men úshin erteń, 29 tamyzda elimizdiń iadrolyq qarýǵa tyiym salý jónindegi shartty ratifikatsiialaý úshin mańyzdy bolyp sanalatyn 20 tetik qabyldaitynyn resmi jariialaý zor mártebe. Qazaqstan uzaq jyldardan beri iadrolyq qarýdy taratpaý bastamasyna qoldaý kórsetip keledi jáne óziniń seriktesterimen tyǵyz yntymaqtastyqty jolǵa qoiǵan», - dedi ministrdiń orynbasary.
Aita keterligi, eki kúnge sozylatyn seminar jumysyna iadrolyq qarýdan azat aimaqtar, onyń ishinde afrikalyq (Pelindaba kelisimi), latynamerikalyq (Tlatelolko kelisimi), Ońtústik-Tynyq muhity (Rarotonga kelisimi), ortaaziialyq (Semei kelisimi) jáne Ońtústik-Shyǵys Aziialyq (Bangkok kelisimi) aimaqtary ókilderi qatysyp jatyr.
